ALÈS
Per Ive Gourgaud
& lous cévénous !!!
À mis ami d'Alès
- Alès, moun Alès tant poulit!
(LA FARO-ALES)
Alès! Alès! O vilo amado,
Quouro béurai ti souleiado,
Coume au printèms de mis annado?
Quouro veirai ta Pradarié
Ti colo griso d'óulivié,
Ti plano vèrdo d'amourié?
Ah? quau poudra me dire quouro
Ausirai lou plagnun dis ouro
Dóu vièi clouquié plen de tourtouro?
Quouro anarai, comme àutri-fes,
O Gardoun, sus toun ribeirés
En pantaiant cerca lou fres,
E, sus ta pradello superbo,
Quouro poudrai legi dins l'erbo,
O Lafaro, noste Malherbo,
Alès, moun Alès tant poulit
En toun cevenòu parauli,
Mèstre mai grand que Goudouli?
Castagnié bressa pèr l'aureto
Quouro poudrai à vosto oumbreto,
En soumihant faire pauseto,
Oublidant Paris e soun trin,
La poulitico e soun verin
Lou mounde e soun charivarin
Sèns autre brut que l'armounìo
Di cigalo, di cardouniho,
E dóu piéu-piéu de l'auceliho?
Enebria di siavo sentour
De la garrigo touto en flour,
Coume au bèu tèms de mis amour,
Quouro farai pelerinage
O Flourian, à Bèu-Rivage
Pèr saluda toun verd bouscage,
E quand lou vèspre toumbara,
Quand lou cèu beluguejara.
Quand lou campèstre dourmira,
Quouro moun amo trevarello,
O pouetico farfantello
Reviéudara l'oumbro d'Estello?
Aucun commentaire:
Enregistrer un commentaire