LOU VARLET SÈNS PIETA
(Parabole du Serviteur Impitoyable)
Me souvène qu’un vèspre, en sourtènt de l’escolo,
Un que legissié’au libre, e ié disien Matiéu,
D’un moustas me faguè toumba dins la regolo,
E pamens, de segu, i’avièi pas rèn fa, iéu.
Ma grand que m’esperavo au pas de nosto porto,
Pechaire! aguè lèu vist qu’avièi quauque chagrin.
-Eh! de qu’as, moun bèu droule? E dins mi pèu bloundin,
Passè si det frounzi coumo de fuieo morto.
-Un di grand m’a pica, pièi s’es encouri, vai,
Bouto, deman matin aurai uno catouno,
E zou!... m’a batu iuei, deman me venjarai.
-Moun fil, diguè ma grand, te venges pas, perdouno.
Escouto aquesto istòri. Es Jesus en persouno
Que la disié’autour d’el. Coumo fas, Diéu fara,
Se perdounes, un jour Diéu te perdounara.
Un Rèi voulié regla si comte
Emé si baile e si varlet.
Zou! qu’un davale e l’autre monte,
Venien coumo la boulo au le.
Un, quand lou Rèi l’agué fa béure,
I’espinchèron si papié, pièi,
Lou Rèi à logo de ié déure,
Es lou varlet que devié’ au Rèi.
S’èro endéuta, save pas coumo,
Sai que devié s’adouna au jo,
E coumo èro uno grosso soumo,
Lou Rèi en coulèro d’acò,
Ço dis: -As proun fa bono vido,
E moun argènt me fai besoun.
Zou! recors, fasès-ié sesido!
Gendarmo, metès-lou ‘n presoun!
Lou varlet, tant sa peno es grando,
Plouro, se derrabo li pèu,
En sousclant, à grand cris, demando
De tèms pèr paga ço que déu.
Parlè de touto sa rabasto,
De sa fenno, de sis enfant...
Lou Rèi, qu’èro de bono pasto,
Lou Rèi ié dounè soun vatan.
L’autre, sèns demanda soun rèsto,
Dis gramecis, saludo e part. -
Quand es deforo, ausso la tèsto,
Devisto un paure ome à l’escart
Que marcho en rasclant li muraio.
Noste varlet ié part dessus,
Ié mando la man à la gaio:
-Me deves, pago-me, vièl gus!
Aqueste, en tramblant ié fai: -Vejo,
Camarado, te deve, es vrai,
Perdras pa’ ‘n sòu, ai bono envejo,
Emé lou tèms te pagarai,
Espèro-me jusqu’i segado...
-Me fau d’argènt aro, o senoun
À l’oumbro, à l’oumbro, camarado!
E lou faguè metre en presoun.
De baile l’aguèron lèu prèsto.
Se passejavon cinq o sièis,
Veguèron touto la batèsto:
Vite, anèron tout counta au Rèi.
Aqueste, endinna, mandè querre
Cp sur cop, lou varlet sèns cur,
E ié diquè ‘nsin: -Marrit ferre!
Rascassot! Double ustansihur!
Me deves e iéu te fau graço,
Tus fas pas graço à quau te déu!
Bouto, te vau metre à ta plaço,
Quau tiro d’aigo, eici, la béu.
An! d’aut! au cachot! Dous gendarmo
Ié pausèron la man dessus.
Aguè bèu à toumba de larmo:
Lou Rèi lou perdounè pas pus.
-Se Matiéu t’a pica, qu’un autre lou saboune,
Tus, ié vogues pas mau. Coumo fas, Diéu fara:
Se perdounes, un jour Diéu te perdounara.
Aima, toujour aima... Fau pas qu’acò t’estouno,
Diéu a pas d’autro lèi, pleguen-ié noste cur. -
-Ma grand, perdounarai pèr que Diéu me perdoune... -
E ma grand m’embrassè, plourouso de bonur.
Aucun commentaire:
Enregistrer un commentaire