Louis ASTRUC : LA MAR RIS

LA MAR RIS 

Coume une cabro fouligaudo 

Cour disaverto; es bon matin, 

L’aubo mesclo soun diamantin 

A la mar facho d’esmeraudo. 

Eilavau, lou fort Sant-Louvis 

Sort de soun sen coume uno estello, 

Lou pescaire urous alestis 

Si fielat e si canestello. 

Coume de pichot gàrri blanc 

Que soun lou jouguet d’uno cato, 

Dins la luenchour la mar acato 

Barco, barquet, batèu galant; 

Çai lou ventoulet boufo puro 

L’óudour dis augo qu’a rauba 

En flourejant la bourdaduro 

Resplendissènto dóu riba. 

Es l’ouro ounte tout se reviho 

Sus la mar; lou cèu es risènt 

E counvido à freireja ‘nsèn 

Lou travai e la pouësìo: 

E lou pouèto à l’ourizount 

Cerco à legi dintre la brèino, 

Dóu tèms que dison si cansoun 

Li travaiaire de la Sèino.

Pèr la Sèino van s’embarca 

Ei travaiaire de marino, 

Dóu soulèu sout la flamo aurino 

Un veissèu nòu vèi boulega. 

E lou pouèto vèi lis erso 

Que s’aprèston à batre un ban 

Is avans-gardo dóu Coumèrço, 

A-n-aquèu pople fièr e grand. 

Dóu cèu la mar es lou mirage: 

Se Diéu mau-countènt trais si tron. 

Di bastimen pico lou front 

E de l’iro sort lou naufrage, 

Mai vuei amount tout es seren, 

Tout dèu canta, car l’oundo dindo 

Car sus l’empèri de Sufren 

La gràci trauco siavo e lindo. 

Vese li ro douçamenet 

Sautourleja sus l’aigo claro 

Tau que d’enfant que bresso encaro 

La maire emé si poutonnet; 

Vese li roucas fort, sevère, 

Dintre l’espèro dóu marin 

Qu’à soun pèd vai manda lou ferre: 

I’aura pas d’estèu de-matin. 

Vese la pas e l’alegrìo 

Lis isclo alin soun touto d’or 

E jiton eiça vers lou port 

Un rebat d’aubo qu’escandiho; 

La mar es véuso de gabian, 

Mai en l’èr milo dindouleto 

Passon, repasson, pièi s’en van 

An, pèr fugi, coumprés l’aureto.

Vese enca, vese lou bonur. 

Vese un gros bastimen qu’arribo 

E quàsi lèst à touca ribo; 

Despaciènt, coupant li flot pur, 

Dins une barco un jouvènt remo, 

Manjo l’espàci dóu regard... 

O dous amour! vese uno femo... 

E de poutoun pleno es la mar! 

Vese plus rèn, mai bèn entènde 

Enjusquo dins moun cor prega, 

Dins la countemplacioun nega 

Ause tout ço qu’à Diéu se rènde. 

E ris la mar de tant d’amour, 

E lis oundo en partènt courriolo, 

Van dire aquelo bono imour 

A l’óurizount, is isclo, i colo! 

Louis ASTRUC. 

Touloun, 9 de nouvembre 1878. 

***

AGUSTE VERDOT. : LOU MARIAGE ASTRA

LOU MARIAGE ASTRA 

                               A Madamo Frederi Mistral 

....dins l’ordre divin tout se fai pèr un bèn. 

                                                 F. M. 

Quau es aquelo grando e bello, 

Aducho pèr une auro d’aut, 

Que s’avanço coume Esterello 

A l’endavans de Calendau? 

Vers la capello di Tres-Damo, 

Quau es aquelo que descènd, 

E ié vai prega pèr quau amo, 

Coume Mirèio pèr Vincènt? 

Quau es aquelo que lis Ange 

I’an fa ‘usi de celèsti cant, 

E qu’a vist en un sounge estrange 

Uno grand fèsto is Aliscamp? 

Dison que s’apello Marìo... 

Marìo, un noum quàsi divin, 

Un rebat de l’astre que viho 

Sus la barco e sus li marin.

Eh bèn! Marìo es la fiançado 

Que, majestouso dins soun dòu, 

La Maire au Fiéu a designado, 

E lou Fiéu a di: — Diéu lou vòu! 

Noun es duquesso ni barouno; 

Plai Galatèio e Beatris, 

Mens que la chato bourguignouno, 

An l’estè pur qu’amourousis. 

Es, dóu pouëto e de l’artisto, 

Lou desir devengu tresor; 

Es uno encarnacioun requisto, 

Vièsti embauma d’un pantai d’or. 

Vejo-nous dounc, vas de jouvènço, 

Li perfum qu’as tengu rejoun, 

E lèu flourigues en Prouvènço, 

Poulido Roso de Dijoun! 

Vai, la Prouvènço t’esperavo: 

Sèns te counèisse t’amavian; 

Es pèr toun front que se gardavo 

La courouno que trenavian. 

En glòri, vai, saras aussado 

Coume uno Rèino, e de cant dous 

Saras bressado e caressado 

Pèr toun felibre amistadous. 

As tout quita pèr veni nostro: 

Brès nadalen, jardin flouri, 

Amigo e maire... acò nous mostro 

Quau siés e quant vau Frederi. 

Segound la lèi de Prouvidènci, 

Tout bèn qu’es fa, di vo pensa, 

Meme au courrènt de l’eisistènci, 

Dèu èstre larg recoumpensa.

Quand à la porto d’un o d’uno 

Veirés adounc veni pica 

L’amour, la glòri, la fourtuno, 

Digas: — Éi Diéu que vèn paga. 

Aro es fourtuno, amour e glòri 

Qu’au meme oustau toumbon subran; 

Un jour saubren li vertu flòri 

D’Éu e mai d’Elo... En esperant, 

Canten la nòvio que s’avanço 

E qu’à la Prouvènço, emé siuen, 

Adus lou poutoun de la Franço, 

Poutoun que clantira bèn liuen. 

Aupiho, boundas d’alegresso! 

Rose e Durènço, Mar e Crau, 

Saludas vosto segnouresso! 

Veici l’Espouso de Mistrau. 

MANDADIS 

E tu, soun urouso Mirèio, 

Richo d’amour e de béuta, 

Vène recebre, pèr liéurèio, 

L’anèu de l’inmourtalita! 

  

                                       AGUSTE VERDOT. 

Eiguiero, lou 10 d’óutobre 1876.

*+*+*

LEOPOLD VIDAU : DURÈNÇO - Durance (poésie provençale)

DURÈNÇO 

Pèr lou Mèstre F. Mistrau 

Iéu, Durènço, dins tu vese la man amigo  
Dóu Diéu qu'amo Prouvènço, e que se la castigo,  
Tambèn la fai flouri!

Auzias JOUVEAU 

Sus li mount nivoulous is auturous cimèu, 

Que sèmblon à l'assaut escalada lou cèu; 

Trone di diéu, daura pèr l'aspro souleiado, 

Ounte l'aiglo soulet auso pausa si piado, 

Ount l'ome n'es rèn, mau-grat que sigue grand, 

E clino bas soun front davans lou Soubeiran; 

D’un massis grandaras dis Aup escalabrouso, 

Sout lis aut sapin vèrd i flajo espetaclouso, 

Un galant pichot riéu au cascai inchaiènt 

Sourgis quàsi crentous, riserèu, blugissènt. 

Trantaiant un moumen, plan-planet lou riéu coulo 

Au travès di roucas clafi de ferigoulo, 

Dins la mousso courrènt, argentau, cristalin, 

Counvido à lou segui lou Verdoun, soun vesin: 

Poulit riban d'azur qu'un enfant sautihejo 

E mounte, un pau pu grand, gabouiant, arpatejo. 

Aqui li pastrihoun abéuron si troupèu, 

E se vènon nega li raias dóu soulèu. 

Salut, ounour à tu, fouleto Durènçolo! 

Toun clar e gai din-din nous charmo e nous counsolo. 

Portes, dins ti flanc pur, bonur, fecoundita, 

Joio dins la Prouvènço, emai dins lou Coumtat. 

***

Au païs de Mistral aro barrules fièro. 

Li tout pichot valat fan li grando ribièro. 

Tu, riéu qu'en sourgissènt siés timide e crentous, 

Souto de pont gigant passes crano, auturous; 

Portes batèu, lahut, e tis aigo argentado 

Poutounon de si flot amèu, vilo, bourgado. 

Aro, pòu dóu Ventour boufa lou vènt-terrau, 

A peno soun alen frouncira toun mirau. 

Dins toun lié guerlanda di roso tamarisso, 

Mescla d'arnavèu d'or, liga d'entravadisso, 

Grando, emé majesta coumplisses toun destin; 

Ris la prousperita dóu vièi pople latin. 

Coume lou pelican, coume uno bono maire, 

Te derrabes li flanc pèr tóuti nous coumplaire; 

E d'amount, e d'avau, e d'eici, e d'eila, 

Te partajes en cènt pèr tóuti sadoula, 

Fecoundant li meissoun, ativant la fabrico, 

Tremudant li trescamp en isclo magnifico, 

Proudigant sus toun cous richesso e resplendour, 

Siés l'ounour, lou soulas di felen di Ligour. 

*** 

De l'aigueto endourmido agues pòu! dis lou Sage. 

Sus ti bord subre-tout es vertadié l'adage. 

... De grand nivo negras mascajeron lou cèu, 

E d'un velet de dòu s'es drapa lou soulèu. 

Lou tron espetaclous eilamoundaut boucano; 

Lou son dóu toco-san restountis dins la plano; 

L'uiau chimarro l'èr, bouto lou nivo en fiò; 

Mesclado au brut di tron la raisso toumbo à brò. 

A l'alen dóu Gregau, la nèu, qu'es coumoulado, 

Revouluno e se found, darunant en cascado, 

Au revòu tirassant li roure segne-grand, 

Li castèu di bourgés, li bòri di pacan. 

De que siés devengudo, ô ma bluio Durènço, 

Tu l'espèr, 1'aveni, glòri de la Prouvènço? 

Coume un doublen feroun davalant dóu tremount, 

Semenes pertout dòu, rouino e cousternacioun. 

Li roucas trantaiant sus si baso insoundablo, 

Soun di cimo empourta tau qu'un pessu de sablo, 

E li pont ufanous pèr lis ome dreissa 

S'agrason 'm'estampèu pèr te leissa passa.

Noun, rèn pòu resista davans la desboundado 

Dóu riéu que tout d'un tèms se mudo en Durençado 

Li vèrd e gai jardin di costo de l'Uba, 

E li bèlli meissoun qu'en or viéu van toumba, 

E li vergié carga de frucho sabourouso, 

En un jour soun nega dins tis erso fangouso. 

L'ome davans lou fièu demoro espavourdi; 

Se demando en tremblant quau pòu l'agué bandi; 

Se van recoumença li bataio ournerico 

Di Titan à l'assaut di planuro oulimpico. 

Dins soun nis espóuti l'auceloun pivela, 

Clavela pèr l'esfrai, amaiso soun quila: 

Sèns coumprendre, regardo aquelo pountanado, 

Ounte, dins un ourriblo, afrouso poutounado, 

Soun liga terro e fiò dins un tau chapladis 

Qu'arrouinon dins un jour lou pu bèu di païs. 

* * * 

O fièu devastatour, fini soun ti ravage. 

Coume un lioun gava dormes sus toun carnage. 

Au Rose as carreja milo rambai mescla; 

Bramant, sale, escumant, toun desbord a fila. 

E — miracle sublime en terro prouvençalo, — 

Lusis mai lou soulèu, canton mai li cigalo!... 

+ + + + + + + + + + + + 

  

Peireto Berengier : La baumo di pantai esvali

La baumo di pantai esvali 

Vinten anniversàri de la Baumo Chauvet. La grotte des rêves perdus, èro lou  titre d’un filme 3D, de Werner Herzog, sus aquesto baumo d’eicepcioun. Pèr lis Ardechés, li pantai soun pas tóuti esvali bord que nosto baumo es plus nostro mai apartèn, à l’ouro d’aro, au patrimòni moundiau de l’Umanita. L’Unesco l’a decida à l’unanimeta, lou 22 de jun 2014 à Doha (Quatar) e n’en sian proun fièr. Es lou 39en site classa en Franço (après lou Palais di papo, lou Pont dóu Gard, etc.)

Aquesto baumo es uno baumasso inmènso que, despièi 20.000 an, pas degun l’a pouscudo degaia. Es pas vuei que l’anan abandouna… Si paret, vous l’an proun dich e moustra, soun atapado de dessin, d’obro que temóunion de la pountanado que lis ome de Neandertal trevavon aqui. Vuei, i’a que li saberu passa au drai, lou pessu, que ié podon rintra. Autambèn, aqueste filme es uno óucasioun eicepciounalo pèr nautre e lou fau pas manca se passo o repasso au vostre. 

Fai tout bèu just vint an (èro en desèmbre de 1994) que de jóuinis Ardechés fasien la descuberto ufanouso proche Valoun Pont d’Arc. Se doutavon pas, à-n-aquéu moumen, que metien lou mounde entié à barbela. D’efèt aquéu santuàri souto-terro fai lou bonur di cercaire e nous ajudo miés counèisse nòsti rèire. Recate paleountoulougi, es subre-tout un relicàri d’un milié de representacioun, de 400 dessin d’animau di mai requist. Un cap d’obro de l’art parietau que dato de 36.000 an ! (dato coumtado raport à 1950 qu’es l’annado referènci pèr la datacioun au carbone 14). Lascaux sèmblo bèn jouineto à coustat d’aquéu « museon » de l’Aurignacian que revouluciouno ço que cresien de saupre sus l’evoulun de l’art preïstouri. Nòsti vièis Ardechés avien deja de teinico que li cresian mai recènto. Soun art èro forço varia e s’aprouchavo meme dóu dessin anima pèr marca lou mouvamen emé de bèsti que multiplicon si pauto…

Fauguè rèn qu’un an pèr la marca i Mounumen Istouri (1995) e vint an plus tard la vaqui marcado au patrimòni moundiau de l’Umanita. Lou mounde entié la dèu dounc assousta. Pèr l’ouro es lou Despartamen, la Regioun e l’Estat que travaion à soun site de restitucioun que ié poudren ana bada, dins un an, emé li 400.000 toutristo espera !… 

Peireto Berengier

Jean-Henri Casimir Fabre : Pelican l'Einat - sur une idée, une illustration & une mise en page de Catarino Lacroix

Pelican l'Einat

Siéu Pelican l'éinat, lou marchand d'escoubeto, 

         Siéu Pelican l'espeiandra ; 

Vènde de barbabou, de mourre, de mourgueto 

         Culido sus l'erbo di prat ; 

         Siéu Pelican l'espeiandra.

Se dins ma pocho, un jour, cascaion li dardeno,

         Dóu ferre vièi, dóu vèire rout 

Penjarai lou grand sa sus ma pauro coudeno ; 

         E lou savès : menon à tout 

         Lou ferre vièi, lou vèire rout.

Bessai me menaran, outre ! à leva de chico 

         Em'uno carriolo à dous chin. 

Lou dimenche, i cafè, sus la damo de pico, 

         Farai tira d'aucèu. Ansin 

         Roularai carrosso à dous chin. 

— Vai bèn. Lou ferre vièi, li barbabou, li peto 

         T'an enrichi, moun Pelican. 

E pièi, di quatre sòu qu'as mes dins la pateto 

         En trimant pire qu'un pacan, 

         Que n'en faras, moun Pelican ?

Te lou vau dire : auras acaba ti journado. 

         Lou nis basti, l'agasso part. 

Escranca, tout frounsi, li mesoulo jalado, 

         A d'autre leissaras ta part ; 

         Lou nis basti, l'agasso part. 

     

                              

Serignan, febrié 1891

Pélican l'Aîné. 

Je suis Pélican l'Aîné, le marchand de petits balais, 

         Je suis Pélican le dépenaillé;  

Je vends du salsifis, du pissenlit,des colimaçons,  

         Cueillis sur l'herbe des prairies; 

         Je suis Pélican le dépenaillé.  

Si dans ma poche, un jour,sonnent quelques sous, 

         De la vieille ferraille et du verre cassé, 

Je suspendrai le grand sac sur ma pauvre peau,  

         Et vous le savez : cela mène à tout 

         La vieille ferraille et le verre cassé. 

Peut-être me mèneront-ils, outre! à lever des cocons de rebut 

         Avec ma carriole à deux chiens.  

Le dimanche, dans les cafés, sur la dame de pique, 

         Je ferai tirer des oiseaux. De la sorte 

         Je roulerai carrosse à deux chiens.   

-  Cela va bien. La vieille ferraille, les salsifis, le crottin  

         T'ont enrichi, mon Pélican. 

Et puis des quatre sous que tu as mis dans l'escarcelle 

         En trimant pire qu'un pacant, 

         Qu'en feras-tu mon Pélican?  

Je vais te dire : tu auras fini tes journées. 

         Le nid bâti, la pie s'en va 

Ereinté, tout ridé, les moelles gelées, 

         A d'autres tu laisseras ta part; 

         Le nid bâti, la pie s'en va.  

                              

  Sérignan, février 1891. 

*+*+*

Jean-Henri Casimir Fabre : 

né le 21 décembre 1823 à Saint-Léons du Lévézou (Aveyron), mort le 11 octobre 1915 à Sérignan-du-Comtat (Vaucluse), homme de sciences, humaniste, naturaliste, entomologiste éminent, écrivain passionné par la nature,  poète français et  provençal, Majoral du Félibrige (Cigalo de Carcassouno, o de l'Amourié) en 1909,  et lauréat de l'Académie française.

*+*+*

FRANCÉS DELILLE. : LA BELLO PROUVENÇALO

LA BELLO PROUVENÇALO 

Oh! t’ame, bello prouvençalo, 

Emé ta caro bruno e palo, 

E toun còu douçamen clina. 

Souto ta pèu caudeto e fino, 

Se vèi qu’un noble sang camino, 

Lou sang dóu Miejour incarna!

De toun front seren, la pensado 

S’escapo emé l’escandihado 

De ti grands iue inteligènt; 

E ta longo cabeladuro 

Courouno ta gènto figuro 

D’un diadèmo trelusènt.

Ta gauto es fermo e redouneto, 

Touto risènto es ta bouqueto 

Qu’oumbrejon de pichot péu blound: 

E quand ti labro purpurino 

Laisson vèire ti dènt divino, 

Vers tu s’envolon li poutoun. 

Bèn viróutado es toun auriho; 

Toun jougne es uno meraviho; 

Toucaren pas lou blanc fichu 

Que, davalant de tis espalo, 

Cuerbe dos roso vermeialo, 

E tèn dous bèu fruch escoundu. 

Que dirai de ti man de fado, 

Tant mignoto e tant engaubiado 

Que fas ço que vos de ti det? 

Quand trepèges l’erbo flourido, 

Margarido di margarido, 

Ièu beisariéu ti pichoun pèd. 

Mai que soun, o bello chatouno, 

Lis agramen de ta persouno, 

Pròchi di gràci de toun cor? 

Noun pourriéu jamai, en counsciènci, 

Despinta toun inteligènci, 

E de ti vertu lou trésor! 

M’arrestè dounc dins ti lausàngi... 

L’ome pòu pas lausa lis àngi! 

Es deja proun bèu soun destin, 

Quand davans èu soun àngi volo, 

Pèr lou guida dins sa draiolo, 

E l’assousta dins soun camin. 

FRANCÉS DELILLE. 

Ais, janvié 1879.