Sur une idée & une présentation de Yves Gourgaud : La pèiro plantado - Un conte lozérien d’Emile Philip

 

 

 

 

La pèiro plantado
Un conte lozérien d’Emile Philip

    Emile Philip continue la tradition de prosateur en langue cévenole initiée dans sa famille par son oncle, l’abbé Jean-Baptiste Philip. Ce dernier, né au Bouchet-de-Chadenet (canton du Bleymard) en 1899, va publier deux beaux recueils de proses, le premier en 1956 (Lou merle gabal, 56 pages) et le dernier, bien plus conséquent, en 1974 (Un cop èro à Sent Firmin…, 190 pages). Une prose exemplaire : chaque récit est court (jamais plus de deux pages), ramassé, nerveux, précis.
    Son neveu Emile, quant à lui, s’est d’abord signalé en 2009 par un long récit de souvenirs en français : De ma jeunesse…, ouvrage de 331 pages illustré de photos, où le goût pour la lengo nostro apparaît régulièrement (titre d’un chapitre : « La charbounado »). Cet ouvrage apporte d’ailleurs un précieux témoignage sur la personnalité de « l’Oncle », auquel un chapitre entier est consacré (« la visite de l’Oncle », pages 165 à 176).
    Mais Emile n’a pas voulu s’en tenir là : à son tour il a pris la plume pour tenir, en langue du pays, une chronique de la civilisation lozérienne. En cours d’élaboration, cette œuvre marquera, je n’en doute pas, une nouvelle étape dans ce qui fait la spécificité de l’écriture cévenole en Lozère, à savoir la construction d’une prose littéraire de haut niveau. Les générations précédentes nous avaient donné les prosateurs Georges Bruniquel (dit Chazenquet) du canton de Florac, Camille Gaillard du canton de Barre-des-Cévennes, et pour le canton du Bleymard, outre Jean-Baptiste Philip, ses deux collègues en religion Ange Peytavin et Félix Vidal. Voilà qu’en quelques mois sont apparus deux nouveaux auteurs en prose, encore et toujours du canton du Bleymard : Hubert Nogaret dont Marsyas2 a déjà parlé, et Emile Philip dont nous donnons maintenant un des deux textes qu’il a eu la gentillesse de confier à l’Armagna Cevenòu 2014.
 

 

Yves Gourgaud. 

Texte tiré de l’Armagna Cevenòu 2014, aux éditions populaires Aigo Vivo. Pour obtenir cet ouvrage (qui n’est disponible dans aucune librairie) : chèque de 5 euro à l’ordre de : Yves Gourgaud. Adresse postale : Yves Gourgaud, 56 avenue du 8 mai, 30520 Saint-Martin-de-Valgalgues.

 

 

*+*+*

LA PÈIRO PLANTADO

 

 

    Bous parlabe en coumencent d’aquelo peirasso plantado en facio de la crous… l’en arribèt uno crano. Co si passèt quond sion deja belets. Nosto damo en bareno de Louzero èro un peiras afoujaçat soubre aquel moure en agachent la crous, coumo se bouliò durmi tranquilament. Mes i o toujour quaucus per bous pouri la bido.

    Aquesto pèiro nous dounabo à pensa, e ni parlessiom un jour à nosto cousino Julieto que couneissiò belcop mai de causos que nantres. Nous espliquèt qu’aquesto pèiro s’apelabo un menhir ! e atabé que co-z-èro nostes reires que l’abiòu plantado aqui per adoura quauco dibinitat o belèu, un pau coumo uno crous, per ounoura un grond persounage. E dequé dounc beniò faire aqui quel coulhou d’ome, dinc un païs que memo lous croupatas i si puòdou pas faire ? Tout acò nous passabo subre la testo e pensabiom nantres que  lou roucas dubiò beni del Louzero qu’es cafit d’aquelos peirassos. Ni parlessiom pas mai…

L’on d’après, un des prumiòs jours de la primo, nous arribèrou dous persounages que, n’on poudiò pas si troumpa, beniòu pas per esterpa de fems. Un bielhot, la testo ploumado coumo un iòu, un coustume que li fasiò pas dafet lou tour del bentre e uno crabato que penjabo del col jusqu’à sas bralhos. L’antre, uno junesso que dubiò sourti de las grondos escolos, bièn proupret e de buono presentacieu, pourtabo quauques outisses. Prenguèrou lus botos e se meteguèrou à mesura, à bira coumo de fedos malautos altour de la pèiro, à espincha l’afaire coumo un medeci soun pacient, tout en parlent uno lengo que coumpreniom pas bièn.

    Julieto, que lous couneissiò, èro aqui, e nantres tabé, amai que ni perdiom pas uno. Quond aguèrou fini de bira e de mesura, s’assetèrou al pè de la bestio. Tout am’un cop, l’arqueoulogo  al coustume estrech diguèt, serious coumo un papo -pas aqueste que ris coumo se beniat de l’en  counta uno bièn buono- :

« Selon toute vraisemblance et en dépit de sa position peu orthodoxe, ce mégalithe doit être considéré comme un menhir. »  Coumprenguère que, dariòs aquelos frasos sabentament entournilhados, ni sabiòu pas mai que nantres. Quauque tems après, benguèrou la redreissa un pau per que co fàsie pus serious. E desempuèi es aqui, quilhado bes lou ciel e fièro coumo Artaban. Quond  bendret al Bouchet, manquet pas de la saluda ambé respet, co’s pas uno simplo pèiro tracho aqui per quauque glaciò i o quaucos lunos, mes uno pèiro plantado, un menhir.

Peireto Berengier : L’Eigoutié

L’Eigoutié

Tre 1980 e fin qu’en 1982, cade numerò de l’A.V.E.P. nous regalavo d’un tros d’aquéu pouèmo, d’un legi mal eisa mai que n’avian garda un souveni fort. Vaqui qu’en 2014, l’A.V.E.P. a la bono idèio de nous tourna pourgi lou pouèmo en oubrage bèn presenta e sus bèu papié que rènd lou legi mai agradiéu. N’avian garda lou souveni e sian pas deçaupu.

L’Eigoutié qu’a pèr segound titre La Toulounado, pouèmo prouvençau en XXV cant, es uno obro d’Antòni Favel que restavo escoundudo dins lis archiéu de la biblioutèco municipalo de Touloun e que Rougié Gensollen, sèmpre atravali se groupè à deschifra.
Vai sènso dire que dóu tèms d’Antòni Favel (1750-1830), escrivien un pau coume poudien e que la grafìo di dès tome dóu manuscrit pausavo proun proublèmo. Rougié Gensollen se groupè à restabli la grafìo mistralenco tout en respetant just e just la lengo de l’autour. Avèn dounc aqui un testimòni sus la lengo parlado à Touloun au debut dóu siècle XIX.

L’autour disié éu-meme que voulié passa Oumèro emé si 15000 vers aleissandrin. Adounc es uno meno d’epoupèio tragi-coumico que nous baio. Diéu di ribiero toulounenco en garrouio, viage à l’Oulimpo, atualita de la marino de la pountanado, l’obro, bèn óuriginalo, pòu sousprene mai laisso pas indiferènt que i’a sèmpre quicon à aprene sus lou Touloun d’aquéu tèms.

Rougié Gensollen, noun pas s’acountenta de deschifra, de recoupia, de pica à la machino i’a mai de quaranto an, pièi de pica mai à l’ourdinatour, aguè encaro lou courage d’escriéure uno asatacioun en francés e en proso que seguis lou pouèmo. Vaqui dounc un oubrage coumplèt, saberu, serious e forço interessant pèr tóuti. S’amerito uno bello plaço dins nòsti biblioutèco, subre-tout que fau apoundre en tout acò, dous estùdi de Pau Roux, de noto istourico de Rougié Gensollen e de l’autour !

Óublidessian pas de dire li dessin requist d’Enri Pertus, de Lethuaire, li fotò e li carto anciano pèr apoulidi lou tout.

L’Eigoutié (Touloun, siècle XIX) : pouèmo en XXV cant d’Antòni. Favel, introuducioun e estùdi de Pau Roux - Noto istourico e asatacioun en francés de Rougié Gensollen - dessin óuriginau d’Enri Pertus (586 p., fourmat A4). Costo 31€ (+ 6 de port).

Peireto Berengier

*+*+*+*+*

Sur une idée & présentation de Yves Gourgaud : UNE PROSE PROVENҪALE DE PAUL ARENE

 

 

 

 

UNE PROSE PROVENҪALE DE PAUL ARENE

 

 

Peu de gens savent que le populaire conteur en français de Jean des Figues, ami et collaborateur littéraire d’Alphonse Daudet, avait comme lui écrit des proses provençales. Les éditions populaires Aigo Vivo viennent de rééditer toutes ces proses provençales, en les accompagnant de textes qui éclairent la personnalité de leur auteur, et de belles traductions en provençal de proses qu’Arène avait données en français. Parmi les proses provençales  d’Arène, une s’impose à nous par l’actualité : à l’heure où un dégénéré a cru intéressant de filmer le martyre qu’il a fait subir à un chaton, la belle prose d’Arène nous fait pénétrer dans un monde où le chat, aimant et familier, va rendre à un pauvre homme un service singulier.
Cette prose, il faut le signaler, a été très tôt traduite en langue cévenole : un an après la parution du texte provençal, le journal alésien Lou Cascavèl en donnait une version cévenole, avec la note suivante :
« Aquel delicious raconte dau mèstre-escrivan dins las dos lengos francesos, la dau Nord e la dau Miè-jour, es revira dau journal prouvençau L’Aiòli, ounte escriéu lou grand Mistral e que bailejo en Avignoun lou noble pouéto Folcò » (n° 14, Février 1893)

La dite traduction a été reproduite, aux éditions Aigo Vivo, dans le livret n°52 : Cahiers de Littérature CEvenole (CALICE n°3) : Traduire en cévenol, 2008 (pages 22-24). Cet ouvrage et les Proso prouvençalo de P. Arène sont disponibles uniquement à l’adresse suivante : Yves Gourgaud, 56 avenue du 8 mai, 30520 St-Martin-de-Valgalgues. Pour chaque ouvrage, envoyer un chèque de 5 euro à l’ordre de : Yves Gourgaud.

 

*+*+*

LI CAT DE MOUN GRAND

D’Antibo, 14 de febrié.

D’abord que sian au Mes di Cat, car es au mes de febrié qu’aquéli sànti bèsti van, coume se dis, à Roumo en cantant roumo-roumiau, trouvarés pas en foro de l’atualita que iéu vous parle vuei di tres cat de moun grand.
Fau dire que l’oustau ounte ai agu l'ur de naisse èro pèr li cat, ma fisto, un veritable paradis, emé si loungaru e négri courredou, emé si camarat, si tourno-vènt, soun souleié, tout acò encoumbra d'angounaio e d'argagno mai que mai favourable is escoundudo pèr l'espèro, i sabat de la niue, is ourlànti batèsto, emé de traucarié pèr gagna la téulisso, recatadou sacra, invioulable amiradou, d'ounte en fasènt roun-roun se poudié countempla, tout lou sanclame dóu jour, de dela di cubert, la verdo encencho dóu terraire e, à la vesprenado, la capo dóu cèu blu clavelado d'estello.
 

Moun grand, éu, avié vuetanto an. Mai èro un vièi ravoi e que, pèr rèn au mounde, tóuti li jour que Diéu a fa, aurié jamai manca, davans que de soupa, d'ana béure triqueto, tuba soun cachimbau e faire sa quatreto au cafè dóu bout de la vilo. E de mai avié tres cat : tres cat qu’amavo forço, e que peréu l'amavon proun, à provo que, chasque vèspre quand s’entournavo dóu cafè i'anavon à l'endavans jusqu'au cantoun de la carriero, tóuti tres de-front, si tres co 'n l’èr, e aqui, zóu de roun-roun recoumpensa pèr de caresso ! Em’acò pièi li cat se metien mai en marcho e, tóuti tres de-front, emé si co’n l’èr, jusqu’à la porto, ié caminavon de davans, car sabien, li couquin, que se soupavo pas davans que lou vièi arribèsse.
Pèr malur, à l'intrado de l'ivèr, uno annado, moun grand toumbè malaut. Ié coumandèron de plus sourti, la porto de sa chambro fuguè barrado e coundanado, e li cat lou veguèron plus.

Bèn talamen que noun sachènt ço qu'èro devengu l'ancian, éli anavon, chasque vèspre, à l'ouro acoustumado, jusqu'au cantoun de la carriero, esperavon uno passado, pièi après s'entournavon tóuti triste e la co basso, ço que, e se coumpren, fasié l'estounamen de tout lou vesinage e soun edificacioun.
Mai, un jour sus tóuti lis autre veici que passè pèr la vilo un paure vièi que demandavo. Aquéu paure, à pau près, èro de l'age de moun grand, e, veritablamen, emé soun bastoun, sa barbo blanco e sis abihage blesi, mai perfetamen propre, fau dire que ié retrasié.
Lou paure, justamen, passant à l'ouro ounte moun grand pèr abitudo s'acampavo, li cat, en lou vesènt veni, se ié troumpèron.
Tóuti en rèng, si tres co 'n l'èr, vous trouvarés qu'anèron à l'endavans dóu paure ; passèron, repassèron entre-mitan si cambo ; e lou paure, en lis aflatant emé la man sus l'esquino, murmuravo : « Segnour moun Diéu, li bràvi cat ! »
Pièi se boutèron à marcha, bèn countènt, davans éu, au grand espantamen dóu bon-ome que, dins tout, se meteguè à li segui.
 

Li seguiguè jusqu'à la porto de l'oustau de moun grand, ounte anavo la famiho s'entaula pèr soupa ; e, pèr se pas moustra mens caritadous que li cat, counvidèron ounestamen lou paure à prene plaço à l'entour de la taulo e dins lou fautuei de moun grand.
E ’m’ acò lou vièi paure, tout en curant sa sieto, à tout moumen fasié que dire : « Segnour moun Diéu, la bono vilo – ounte pèr vous moustra lou camin dis oustau, vous mandon de tant bràvi cat ! »

Pau Areno  

(L’Aiòli, n°41, 17 de febrié 1892)

*+*+*+*

F. PEISE : LOU CONSOU DE SIEIFOURS -- CONTES DE SIEIFOURS

 

 

 

Lou 

CONSOU DE SIEIFOURS

HISTOUARO DE L’ANCIEN REGIME

Lou vingt-cinq d’avoust, un diminche au matin,
Et dau bel an de Diou, seize cent trento-cinq,
Lou counseou de Sieifours ero en grando assemblado;
La pouarto de la sallo ero desbadarnado;
Cadun poudiet venir per dounar soun avis;
S’agissiet de noumar lou consou dau peïs.
Mais l’aviet dous partis: leis uns voulien Jean Peire,
Leis aoutres chausissien moun paure vieil grand-reire
Brancai-Bouanaventuro- Estropi Barjomau,
Et leis milhous amis, de paraulo en prepau,
N’erount vengus au point de se mandar de bouffos.
Per calmar leis esprits et parar leis barouffos,
Lou priou de sant Aroi, douyen deis fabriciens,
Homme de bouan avis, ennemi deis passiens,
Mounto sus sa cadiero et d’aquit sus la taulo;
Uno fes ben quilhat, demando la paraulo:
— Meis fraires, meis amis, foou que cauque tavan
Vous ague pougnigus! Perque tant de boucan?
Vous fez de sang bouilhen per uno bagatello.
 

Es pourtant pas malin de fenir la querello.
Per couiffar capeiroun avez dous concurrens;
Soun counouissus touis dous; es de ben braveis gens
Que prendran, siou segur, l’interès dau village.
Mais poudez pas sus dous portar vouastre suffrage.
Vau semoundre un mouyen per vous mettre d’accord;
Veicito moun ideio: Anarenı tout d’abord
S’assetar sus d’un bau, lou long de la callado,
Mandarem un coudoun dedins la devallado,
Qu siegue que voudra champeirar leis hounours
Per estre prouclama lou Consou de Sieifours,
De touteis seis talents duvra dounar la provo.
Se leis dous candidats voualoun tentar l’esprovo,
Partiran en courren; aqueou qu’agantara
Lou prumier lou coudoun, lou capeiroun aura. 

— Es ben dich , Adoté! crido la populaço;
Lou voulem desgordi, voulem ges de radasso!...
Lou priou de sant Aroi, seguit des electours,
Deis nobles , deis borgeouas, deis pacans de Sieifour,
S’assetto gravament sus lou camin deis Playos,
Dejà leis doux rivaus revartegoun seis brayos,
Prenoun la precautien de levar seis soulies,
Si mettoun sus d’un rang per ben partir paries.
Que moument solennel! aqui degun bouffavo....
Cadun, lou nas en haut, coumo un limbert badavo.
Au coou de pistoulet, Jean Peire et Barjomau
Partoun talamen fouart qu’auriaz dich un uyau.
Sautavoun leis abroues, leis argeiras, les touscos...
 

Avien pas de besoun de se couchar leis mouscos.
Animas per leis cris qu’entendien de partout:
— A tu, Jean Peire! à tu! courage! aganto-lou!...
— A tu, zou! Barjomau, que seras nouastre mèro!
Courrien coumo lou vent. Mai vai-ti far lanlèro!
Au moument que Jan Peire anavo l’agantar,
Lou coudoun reboumbello et d’aquit va sautar...
(Hurousamen per iou que quouaque galejaire,
Degan m’a jamai fach passar per un charraire)...
Au mitan d’un pouciou, dessus lou nas d’un pouar
Que dormie, la cauvasso! en esperan lou souar,
Senso si marfisar de tant bello aventuro.
Aqueou vilen groussier, dins la memo pousturo,
En renan, ‘me soun bec, aganto lou coudoun,
Se mette à lou rouigar senso tant de façoun.
Alors l’aguet qu’un cris dintre touto la bando:
— Es lou Consou que foou! lou bouan Diou nous lou mando!
Ce qu’es dich, es ben dich! lou sort à ben resoun!
Quimhat dins un fautuil, couiffat dau capeiroun;
Seguit dau pople entier, lou ponar dins la grand sallo,
En trioumphe portat coumo un Sardanapalo,
Siguet recounneissu per Consou de Sieifours.
L’histouaro nous dis pas si faguet un discours.
Et Jean Peire disiet: — Que n’en penses, couleguo?
Sies pas de moun avis?  Aquello, si, qu’empeguo!
Barjomau respoundiet, risen de tout son couar:
— Lou pouar es mèro, es vrai, mai lou mèro es un pouar!
 

- - - 

CONTES DE SIEIFOURS

BATISTO ARTOU : L'OUSTAOU ENMASCA

L'OUSTAOU ENMASCA 

L'a moussu lou jùgi de pas doou XIIIe cantoun de Marsiho, que ven d'estre apela à juja un  cas de mascarié. Veici lei fet.
Misè Taoulissiè ooucupavo despuei tres an un estànci dins l'oustaou de misè Canàri,  carrièro dei Grand Carme. Lou proumier an, tout anè coumo su de roudeletto, lou segound tamben. Mai lou tresieme leis embroi acoumencèroun e si saoup que quand l'acord l'es plu entre lougatàri e prouprietàri. cado mousco deven un tavan. Misè Taoulissié e misè Canàri, qu'avien counfisa dous an ensem, an feni per si brouiha e si vouié lou maou de la mouart. Perqué? Per de ren, coumo es l'us entre basaruto.
Countaren pa eicito toùti lei pichoùnei misèri que nouèstei doues frumo si soun facho, lei  fion e lei coou d'esplingo que si soun manda. Lou jornaou serié pa proun grand. Es de fet  que misè Canàri, usant de soun dret de prouprietàri, à Pasco a manda la coupio à misè  Taoulissié. Aquesto n'a pa boufa v-uno, mai s'es dicho:
— Mi vinjarai, poutènci; siès uno grosso avarasso, ebè! ti vaou prendre mountè ti couei  l'ensàrri. Qu'a fa alor misè Taoulissié? Es anado trouva la frumo que fa lei carto: la masco  de la carrièro doou Traou d'Aran, e l'a di: L'a ma carogno de proprietàri que m'a garça la  coupio, e voudrieou mi vinja en fent quaouco mascarié que l'empachesse de louga soun  oustaou. Avès ren per acò?

La masco l'aguè touto lesto, si saoup que per pita de soou, aquèlei gen la counoueisson, e li diguè: — Ai vouesto afaire. Mai lou secret vous couestara vint franc. — M'es egaou, faguè misè Taoulissié, se fa d'efet. E tenès, vaquito quatre escu de cinq franc flame noou aou timbre de la Republico.
La masco l'ensigné la mascarié.

LOU JUGI, à misè Canàri. — Coumprèni pa ben. Mi dias qu'avès fa cita misè Taoulissié  en dooumàgi-interès per que vous a empacha de louga l'estànci qu'ooucupavo.
 

MISÈ CANARI. — Vouei, moussu lou jùgi. Figura-vous que moun estànci es à louga  despuei Pasco, coumo va dis la tabletto, que sian toutaro à San-Micheou e qu'ai pana  pouscu lou louga.
 

LOU JÙGI. — Es vengu degun per lou vesita?
 

MISÈ CANARI. — Sifet. Es vengu bessai mai de cent gen.
 

LOU JÙGI. — Eh ben! alor?

MISÈ CANARI. — Eh ben! alor, degun n'en voou.
 

LOU JÙGI. — Agrado pa?
 

MISÈ CANARI. — Si qu'agrado.
 

LOU JÙGI. — N'en demandas bessai troou chier?
 

MISÉ CANARI. — Nàni, moussu lou jùgi, n'en demàndi pa troou chier. Voou dous cent  cinquanto franc coumo sias un brave ome.
 

LOU JÙGI. — Eiço va ben, vous gramacieou doou coumplimen. Mai que voulès que li  fàgui se poudès pa louga voueste estànci?
 

MISÈ CANARI. — Bord qu'es la faouto de madamo, voudrieou qu'à titre de dooumàgi-  interès la coundanessias à mi paga à mita la rento d'aou mens un an.
 

MISÈ TAOULISSIÉ. — Tè voueste nas, misè tiropuou!
 

MISÈ CANARI. — La vias, aquello insoulento n'a pa proun de m'avè enmasca l'oustaou,  aro mi trato de misè tiro-puou.
 

LOU JÙGI. — V'a enmasca l'oustaou, dias?
 

MISÈ CANARI. — Vouei, moussu lou jùgi. Per si vinja que l'ai manda la coupio, mi l'a  enmasca e pouèdi plu louga l'estànci qu'ooucupavo.
 

LOU JÙGI, à misè Taoulissié. — Es verai, avès enmasca l'oustaou de madamo?
 

MISÈ TAOULISSIÉ. — Ieou? Mi gardarieou ben d'uno cavo ensin.
 

MISÈ CANARI. — Parlas coumo acò, aro que sian davant moussu lou jùgi, mai es pa ce  qu'avès di davant la bouchièro.
 

MISÈ TAOULISSIÉ. — Que bouchièro?
 

MISÈ CANARI. — Misè Pourrièro, la bouchièro de la carrièro Roumpi-Cuou.  

LOU JÙGI. — E qu'a di misé Taoulissié à la bouchièro?
 

MISÈ CANARI. — L'a di: Sabès pa, l'a aqueou viei ravan de misè Canàri que m'a manda  la coupio. Mai mi vinjarai. Faou quo l'enmàsqui soun oustaou.
 

LOU JÙGI. — E vous l'a enmasca?
 

MISÈ CANARI. — Enmasca, dias? Talamen enmasca que l'estànci qu'avié aquello  mechanto, mi resto su lei bras.
 

LOU JÙGI. — Su lei bras! Sias pu fouarto qu'Herculo alor!
 

MISÈ CANARI. — Es uno façoun de parla. Vouèli dire qu'es pa louga.
 

MISÈ TAOULISSIÉ. — Tè, coumo s'èro ma faouto. Un poucieou ensin!

MISÈ CANARI. — Poucieou, quand l'erias. madamo... Vouei, sias anado co de la masco,  va tèni de misè Quinsoun, la rampaihuso de cadièro, e v-a ensigna uno mascarié per mi  porta tort.
 

LOU JÙGI. — Qu'es aquello mascarié?
 

MISÈ CANARI. — D' abord, es misè Bouscarlo, la frumo de meinàgi, que va m'a di, avès  fa set coou de sueito l'entre-signe de la crous en acoumençant per l'espalo gaoucho e en  diant:
— Qu'un lucifer cure l'oustaou de misè Canàri e que si lougue pa! Puei avès près un  saquet, l'avès mès dedins uno couè de limbert, lei quatre pato d'un grapaoud, la testo d'uno taranto, uno alo de machouetto, l'avès pissa dintre en diant:
— Lucifer, que l'oustaou de misè Canàri si lougue quouro lou limbert aoura retrouva sa
couè; lou grapaoud, sei pato; la taranto, sa testo; la machouetto, soun alo e.....
 

LOU JÙGI. — E vous, voueste pissin. Asso! mai vous cresès que lou Gouvernamen mi  pague per aousi de talo gandouaso? Fé-mi un paou lou plesi toùti doues d'ana veire se  vouesto soupo si brulo pa. Ensin juja.
 

MISÈ CANARI. — Ebè! sias ben ouneste, moussu lou jùgi. Mai m'adreissarai à pu fouart  que vous. D'aqueou pas, vaou trouva moussu Passeroun, l'escriban publi, e li farai faire  uno peticien per moussu lou President de la Republico!.....

*+*+*+*+*

Albert ROUX LA PROUFÉTESSO DOU TEMPLE DRUIDIQUE D’UZÈS - - LA PROPHÉTESSE DU TEMPLE DES DRUIDES D’UZÈS

LA PROUFÉTESSO DOU TEMPLE DRUIDIQUE
D’UZÈS
 

En faço dou castel Berard,
Per lo camin dis Escaleto
Ia’qui’n soubaou cata d’un bar
E de laouzo pas pichoteto.
Es rescoundu din li bouïssoun,
Es emplastra contro l’outuro.
Per lou trouva foou serca proun.
Faï vis à vis à Fon d’Avuro.
Quaou ié restavo din qu’un tèm ?
Es bateja : Temple Druidique.
Entren ié’n paou se voulès bèn,
Veiren aquel oustaou antique
 

Paréi que dou tèm di Galouès,
Li prumié abitan d’Uzès
S’éroun estaIa ver Fon d’Avuro
Tan bèn foutu per la naturo.
Vous apprendraï pas rèn de noou.
Vole pas tro faïre la résso...
Aquel Temple servié se poou
De clouètre à la Proufétesso.
A drécho din lou ro taya
Espinchas la cambra carrado.
De la vièrjo que ia véia
Quaou sa beléou quand d’annado.
Coundannado aqui per toujour
La paouro sacrifiado ?
Prenié tout juste un paou de jour

Per la fenjasclo eschancrado.
E d’aquel pichot fenestroun,
Quand languissié, pechaïrasso !
Escoutavo lis aouceloun
Canta din la bouscarasso.
Espinchavo li passan
En gemissèn, en pregan.
Beléou de fès se proumenavo
D’avan lou pichot jardiné,
Un Patriarcho la gardavo,
Soul lou bon vièl avié aquel dré
Aquel pretre à barba ranco !
Ero soun soul counpagnoun.
Es el que fasié la pitanço
A l’escar din qu’un cantoun.
La Proufetésso venerado
D’un paoure puple ignourèn,
En attendèn d’estre counsultado
Desperissié din soun couvèn.
 

Albert ROUX

*+*+*

LA PROPHÉTESSE DU TEMPLE
DES DRUIDES D’UZÈS

Exactement face au château Bérard,
Du côté du chemin de l’Escalette,
Une grotte se couvre d’un rempart
Naturel avec de larges arêtes.
Dans les buissons elle peut se cacher,
Elle est appliquée contre la hauteur.
Pour la trouver il faut bien la chercher.
Elle fait face à la vallée de l’Eure ;
Qui y habitait dans un temps ancien ?
Elle a été nommée Temple Druidique.

Entrons y un peu si vous voulez bien
Pour découvrir cette demeure antique.
 

Il paraît qu’à l’époque des Gaulois,
Les tout premiers habitants uzégeois,
Vivaient au bord de la vallée de l’Eure
Que la nature couvre de faveurs.
De nouveau je ne vous apprendrai rien.
Je ne veux pas me répéter sans cesse...
Ce Temple servait, cela se peut bien,
De cloître pour la jeune Prophétesse. 

Sur la droite dans le rocher taillée,
Regardez donc cette chambre carrée
De cette vierge qui y a veillé.
Combien d’années peut-être, qui saurait,
Emprisonnée dans ce lieu pour toujours
La pauvre sacrifiée séquestrée ?
Elle ne recevait qu’un peu de jour

Traversant une lézarde échancrée.
Abritée derrière ce fenestron,
Quand elle languissait, la malheureuse
Donnait son attention aux oisillons
Qui chantaient dans les touffes épineuses.
Elle guettait l’arrivée des passants
Avec des gémissements, en priant.
Parfois pourtant elle se promenait
Devant le tout petit jardin étroit
Tandis qu’un Patriarche la gardait,
Seul le bon vieux avait reçu ce droit.
Avec sa barbe chenue ce prélat (4)
Était le seul à vivre à son côté.
C’est lui qui préparait tous les repas
Dans un tout petit recoin écarté.
Cette prophétesse, en vénération
Auprès d’un peuple pauvre et ignorant,
En attendant ses vaticinations,
Dépérissait au fond de son couvent.
 

Albert ROUX

*+*+*

Peireto Berengier : Alphonse Daudet, sèmpre !

 

Alphonse Daudet, sèmpre !

Lis oubrage sus Anfos Daudet se multiplicon e lou darrié que n’avèn parla countavo touto la dinastìo di Daudet. Vaqui pas que venèn de reçaupre uno nouvello biougrafìo de l’escrivan que la devèn à Vincèn Clap.

Vincèn Clap es un ome discrèt mai atravali. Despièi d’an e d’an, obro is Amis d’Alphonse Daudet e pourgis à la revisto d’article sèmpre requist. En 1989, nous avié deja douna, en coulabouracioun emé Mirèio Bosqui, un oubrage ilustra qu’avié pèr titre « Alphonse Daudet dans son Midi » e en 1986 « L'Arlésienne, Histoire d'un drame ». Aquest oubrage avié ravi lou mounde di saberu coume de tóuti li legèire e despièi quinge an esperavian la biougrafìo. Sabian que Vincèn Clap ié travaiavo e amoulounavo lis entre-signe e li ficho. Se languissian tant que e vaqui que la bono souspresso arribo. Après trento annado de recerco e de leituro, Vincèn Clap nous regalo enfin emé « Trente ans de Daudet (1840-1870) ou une drôle de lutte pour la vie ».

Vincèn Clap nous ié conto li trento proumiéris annado de la vido de Daudet : l’enfanço cevenolo à Nimes, Alès que sara Sarlando, Bezouço ounte ausissié tout pichot nosto lengo ("Bezouce a été un peu pour moi le Maillane de Mistral"), mai tambèn l’Ardècho emé lou mas de la Vignasso à-n-Auriollo proche Ruoums que sa maire i’èro neissudo. Sarié aqui qu’en quitant lou triste Lioun, aurié treva lis amourié, rescountra uno cousino, escri si proumié vers (« Li Pruno »), mai segne Clap a soun idèio aqui sus…  Daudet mountè pièi à Paris ounte soun fraire Arnest fasié journalisto. Se ié marridè e rintrè dins lou mounde di letro.

Daudet gardè sèmpre soun cor en Prouvènço. Font-Vièio emé li cousin Ambroi dóu castèu de Mountauban, e lou famous moulin couneigu dins lou mounde entié (e qu’es vuei, à mand de s’esvali…). Maiano emé Mistral, rescountra pèr lou proumié cop en 1859 à Paris. Vinto-cinq an plus tard escrivié en prouvençau : « Il me semble que c'était hier tant j'en ai gardé le souvenir net […] Vouliéu ié dire : emai iéu l’ame ta Prouvènço, ta bello chato Mirèio, e m’atrove urous que siegues jouine, e de vèire en tu un pau de iéu-meme e dins toun amour viéure tout moun amour ! ». Avignoun em’Aubanel, l’ami tant car, qu’aguè talamen d’influènci sus éu e ié manquè talamen à sa mort. Aubanel que l’amiravo talamen qu’assajè de faire representa « Lou pan dóu pecat » à Paris. Tout acò emé lou mounde felibren èro soun païs, soun nis, soun fougau.

Mai Vincèn Clap seguis Daudet dins Paris, sa vido de jouvènt un pau esfoulissa dins li mitan parisen pas trop clar e sa vido emé Marìo Rieu avans de counèisse Julia Allard que devendra sa femo. Lou seguis tambèn dins lou mounde parisen dis ome pouliti coume li retrouban pinta au det, dins li rouman que dison « rouman parisen ». D’efèt, fuguè secretàri dóu du de Morny e trevè proun aquéu mounde pèr lou bèn counèisse.

Couneissian Vincèn Clap pèr soun umour e soun biais galoi de dire li causo. Aqui, lou retrouban dins tout soun bon emé de titre coume : « Une enfance hâtive et trouble, au milieu d’une maison sans le sou », « Félibres et lions », « Les trente ans que nous n’avions pas encore ».

Anfos Daudet, coume lou dis Vincèn Clap, un « nimesen traspourta à Paris, mai resta fidèu à si racino famihalo », qu’óublidè rèn de si Ceveno roucassouso, de la basso valèio roudanenco tant amistouso.

Vincèn Clap travaiè trento an de tèms, nautre, segur que dins trento an, auren sèmpre lou meme bonur e lou meme interès de legi o relegi aquesto soumo biougrafìco. Gramaci moussu Clap !

Peireto Berengier

Trente ans de Daudet (1840-1870) ou une drôle de lutte pour la vie de Vincèn Clap. Un oubrage de 486 p. au fourmat 14x21. Costo 28 € franco e lou poudès coumanda : M. Vincent Clap, Villa « Fentgien », 7ter ch. de la Justice, 30400 Villeneuve-lès-Avignon.

*+*+*