P. Bigot : SOUVENÈNÇO

SOUVENÈNÇO
 

M’en souvendrai toujour: la fèsto
Emé lou jour avié fini.
Vers soun nis l’alauseto lèsto
S’entanchavo de reveni.
La foulo risènto e tranquilo,
Prenié lou camin de la vilo,
E s’escoulavo pau à pau.
Souto la flueio que tramblavo,
Lou róussignoulet gasouiavo,
Pèr l’escouta tout èro siau.
 

Laissavian enana la foulo,
E caminavian tout planet
Au bord d’aquelo aigo que coulo
Entre l’erbe e li coudelet.
Dins lou sèr que li venié querre
Espinchavian, en aut di serre,
Li darnié raioun dóu sourèl,
Entendian rire lis espigo,
Quand l’auro ié fasié coutigo
En courissènt de grel en grel...
 

Ta man èro aqui dins la miéuno,
Te disièi qu’ères tout pèr iéu,
E que moun amo èro la tiéuno,
E que moun cor èro lou tiéu.
Urous e tramblant, en cacheto
Gueitavo dessus ta bouqueto
Un mot bèn dous, un mot bèn bèu...
Pèr responso à moun amour vivo,
Baisserès la tèsto, pensivo,
E rougo coumo un parapèu.
 

Pourtavo dins ma passioun franco,
Envejo au destin dóu bouquet
De vióuleto e d’anedo blanco
Qu’estrassaves entre ti dèt.
Sus toun front, moun anjo adourado,
Cercavo uno douço pensado,
E l’esperanço dins tis iuel,

èr me refresca dins ma flamo
Aurièi dóu libre de toun amo
Vougu legi tóuti li fiuel!
 

A grand pas la niue davalavo,
Ma mìo, quand nous separèn,
E chasco estello que brihavo
La saludave en sourrisènt:
Ère urous! Aquelo vesprado
Dins moun souveni viéu gravado
Coumo un premié sounge d’amour.
Es uno voues douço qu’escouto:
Tus, l’as óublidado sèns doute,
Mai iéu m’en souvendrai toujour!

- - -