P. Bigot : FINETO

FINETO
 

O fineto tant poulido,
Tant crudèlo aussi!
Perqué semenes ma vido
De tant de soucit?
Chasque mot de ta bouqueto
Es pèr me facha,
Se vos m’aima, Fineto,
Leisso-me t’aima!
 

T’aima, bouto, hou podes crèire
Sèns te mesfia,
Se rèste un jour sèns te vèire,
Sièi desvaria.
Quand passes davans ma porto
Moun cor trefoulis,
Sèmblo qu’un anjo me porto
Dins lou Paradis.
 

A la Font, au Tour de Vilo,
Quand vas proumena,
Dedins la foulo, entre milo,
Save te trouva.
Devigne ta façouneto
Emai siegue escur:
L’iuel trovo vite, Fineto,
Quand cerco em’lou cur!
 

Noun, pode pas me retène
De t’aima toujour,
Sièi triste quand me souvène
De nòsti amour,
Sian urous de nous sourrire,

Nous sarra la man,
De nous parla sèns rèn dire,
En nous regardant...
 

Ingrato, me desespères,
E pamens, un sèr,
Dins un poutoun me dounères
Un pauquet d’espèr.
Me dounères tres floureto,
Li counservarai:
Tus óublidaras, Fineto,
Iéu me souvendrai!

*+*+*