.
La dinastìo di Daudet
Di Daudet couneissèn mai que mai l’Anfos e soun fiéu Leoun. Pamens, touto la famiho fasié dins la literaturo : lou fraire Arnest, la mouié Julia e lou segound fiéu Lucian. Es la saga d’aquelo dinastìo literàri qu’Estefan Giocanti nous presènto dins soun darrier oubrage. Èro deja l’autour d’uno tèsi de dóutourat sus Carle Maurras e avié alor rescountra lou Leoun.
.
Adounc, lou fraire Arnest Daudet (1837-1921), l’einat, fasié journalisto à Paris ; es éu qu’aculiguè Anfos quand ié mountè. Lou menè dins lou mounde de la literaturo e sabèn coume Anfos trachiguè lèu. Arnest èro un Blanc dóu Miejour que tenié de sa famiho. Publiquè d’estùdi istouri coume « La Terreur blanche », « Histoire des conspirations royalistes du Midi sous la Révolution », e bèn d’autre. Un di primadié de l’istòri mouderno.
La mouié d’Anfos, Julia Daudet (1844-1940), s’es proun di qu’escrivié à la plaço d’Anfos. Es belèu ana un pau vite, emai aguèsse de segur participa au travai de soun ome pèr de counsèu sena. De mai, coume èro de modo d’aquéu tèms, tenié saloun e li mai grand se ié rescountrèron : Zola, Leconte de Lisle, Mallarmé, Barrès, etc. Li fraire Goncourt èron pas li darrié de treva la famiho e Eimound presavo forço lis escri de Julia : « Impressions de nature et d’art » (1879), « Lumières et reflets » (recuei de pouèmo de 1920). Emé resoun, Flaubert la disié grando artisto. Poulideto que noun sai, ispirè Renoir e James Tissot. Lou paréu Daudet aguè d’enfant que dous fiéu faguèron carriero. Leoun (1867-1942) e Lucian (1878-1946).
Leoun Daudet, lou sabèn, avié fa d’estùdi de medecino mai se faguè counèisse subre-tout coume poulemisto e escrivan reialisto qu’avié pas pòu de trata la Republico de « crapulocratie » pèr eisèmple ! Sabié pinta li deco e li defaut de cadun emé de mot que fasien mau e restèron dins lis annalo : Clemenceau, « tête de mort sculptée dans un calcul biliaire », Zola « Vénitien de l’égout », etc. Li medecin, « médicastre », lis avié proun treva dins sis estùdi pèr escriéure de satiro crudèlo dins un estile rabelesian. Mai, ami de Maurras, sa plumo la meteguè au service de la poulitico e de l’Acioun Franceso…
Coume li Goncourt avien causi Anfos pèr eisecutour testamentàri, Leoun participè à la foundacioun de l’Acadèmi Goncourt.
Lucian Daudet, éu, fuguè « l’ami », grand e pichot ami, de Proust e de Cocteau… Jouvènt bèu e galant, fragile e delicat, fasié lou dandy e l’artisto. En chancello entre pinturo e literaturo, espausè si tablèu e publiquè rouman e pouèmo. Pau Morand presavo soun obro vuei trop desóublidado. Trevè li mitan parisen, li councert, lis espetacle e s’entrevè de tóuti lis esperiènci artistico de soun tèms.
Tout aquéu mounde es vuei un pau tapa, escoundu, pèr la glòri dóu paire. Un paire, Anfos Daudet (1840-1897), grand countaire que fai ounour au Miejour e à la Franço, presa qu’es dins lou mounde entié. De libre coume « Tartarin de Tarascon » qu’an fa e fan toujour poulemico, estrambourdèron Flaubert que parlè alor de « cap d’obro ». Dickens s’enfiouquè pèr lou rouman « Jack » e Enri James parlè d’engèni pèr « Port-Tarascon » (lou tresen voulume di Tartarin). Se vous dise e redise tout acò es que fai de bèn, tèms en tèms, de durbi lis iue e d’escouta aiours.
La famiho Daudet faguè grando pèr nosto literaturo e la vido culturalo de noste païs.
Peireto Berengier
« C’étaient les Daudet » d’Estefan Giocanti. Ed. Flammarion. En librarié
.
Aucun commentaire:
Enregistrer un commentaire