P. Azema : Mount-Peliè - LA DAVALADA - 1919

LA DAVALADA 

— Quand Mount-Peliè serà toumbat au reng de Pezenàs, me disiè l'autre jour quaucun qu’aima soun Clapàs d'un amour cla-vesent, alors lou mounde s'avisaran belèu que i abiè quicon à faire pèr ié gardà, pèr aumentà se poussible, soun lustre e soun renoum ancians. 

Oi. Soulament, alors, serà trop tard. Seren pas pus qu'una vièlha capitala descourounada, e quand nostes plours rendrièn lou Merdansou rasiè, acò apounchariè pas 'n fus. Es tems, es juste tems, d'oubri lous iols e de reflechi. Dejà, à prepaus de la questioun dau Gard lengadoucian, abèn vist qu'èren pas de pes à luchà emé Marselha: un pauc, saique, perdequ'es Marselha, mès tamben perdequé i a, ailai, d'omes d'iniciativa, d'energia e de voulountat ajudats seriousament pèr las autouritats pouliticas, soustenguts pèr una aristoutracia coumerciala inteligenta e agissenta. Aici, lous pouliticaires vous bailoun de bonas paraulas (que soun pas mèma elouquentas, pecaire!), lous richasses pourrits d'argent couma un chi de nièiras, troubant que tout vai ben d'abord que fan d'afaires e que lou vi aumenta, se boulègoun pas, quitoun virà lou bourdet, sans se rendre comte que toussissoun lou col, à belles paucs, de la galina as iòus d'or. 

E acò dura... jusqu'au jour qu'aurà prou durat. 

Après Marselha, ara, es Toulousa que nous lèva d'aqui en atirant vers ela lous païses dau pounent de la regioun Lengadoc-mieterrenenca. Lèu, la famousa regioun de Mount-Peliè serà estequida à las proupourciouns de l'Erau, amai pas, pioique lou ròdou de Ceta se vira daus Toulousa. Au soulide, Toulousa a fach ce que caliè pèr acò. Mès ce pus triste es que Mount-Peliè a pas fach grand causa pèr hou empachà. Pas grand causa e belèu pas res.Quau s'estouna d'aquela criminala negligença? Quau proutèsta tout naut? Ounte sount, au grand jour, estudiadas las respounsabilitats? 

Poudès cercà! Pus fort que lou regime de l'oupinioun publica e de la libra discussioun, i a lou regime de las camaradariès e de las amistats, indulgentas au pount d'èstre coumpliças. Cau pas cità de noums, ni asartà d'allusiouns, cau pas faire, pareis, de questiouns de persounas! Hé! foutrals, touta la vida, la vida publica couma l'autra, es pas facha que de questiouns de persounas. Las teourias sount bellas, lous principes superbes, lous prougramas manifics, e, d'alhurs, lou tres quarts dau tems, se sembloun toutes. La questioun, la grossa questioun, es de saupre ce que valoun 

lous omes qu'an la pretencioun d'encarnà lous principes e de realisà lous prougramas. 

Aquela questioun, nous la pausaren aici, à l'oucasioun, e ensacharen de ié respondre. N'abèn prou de roullà, barrisca-barrasca, sus una davalada que nous mena drech au cabus. Voulèn d'omes qu’ajoun la pougna de sarrà la mecanica e de remountà lou grimpet. 

Agoust 1919. 

P. Azema : NOSTE AVENI SUS L'AIGA + ENCARA NOSTE AVENI... SUS L'AIGA... + ... E EN QUICON MAI. - 1918

NOSTE AVENI SUS L'AIGA 

Dins soun Boulet Rouge, cremant de pura flamba patrioutica, noste amic Leoun Teissier encadra de bons coumentàris aquesta paraula de M. Lémery, jout-secretàri d'Estat à la marina merchanda: — La France doit redevenir une grande nation maritime. — Redevenir, es ben lou mot. Una granda nacioun maritima, la França hou es estada, dins de tems dejà lionts: lous bèus tems dau canau dau Miejour e de la navigacioun roudanenca, l'epoca que la fièira de Bèu-Caire èra un das grands mercats dau mounde, lou tems ounte èroun viventas e animadas las citats qu’un autou a pougut dempioi sounà: — Les villes mortes du golfe de Lyon. 

S’agis pas de plourà de longa sus aquela descasença: s’agiriè pulèu de n'en cercà las causas e de se metre au traval pèr remountà lou courrent. Diguen-z-hou francament: es pas dequé que siègue, e l’esfors à coumpli es talament grand que i a dequé n'èstre esfraiat. 

La mecanica centralisaira, crestaira de cervèls e de voulountats, nous a trop desacoustumats de pensà e de decidà librament, e sèn devarilhats entre que cau proubà un pessuc d'iniciativa, agi en defora de las direciouns dau goubèr. Regarden, pèr esemple, ce que se passa pèr lou port de Ceta, qu'interessa prencipalament noste parage, e ounte se déuriè metre en pratica lou prougram a de nosta renouvacioun maritima. Tout lou mounde sap, tout lou mounde dis quante grand rolle lou port de Ceta auriè à jougà dins la renaissença ecounoumica dau Bas-Lengadoc. Dins una seria d'articles doucumentats la Revue Méridionale des Idées a estudiat à founs aquela questioun de nauta impourtencia. Ebé! à part quaucas ececiouns ounourablas e preciousas, mès malurousament trop pauc noumbrousas, digus s'en es pas virat. E, à lioga de repoutegà contra l'un e l'autre, vòu mai recounouisse francament que lou prumiè tort vèn das qu'agent lou tems e l'argent, las relaciouns e l'influença, saboun pas ou voloun pas lous emplegà pèr lou ben de soun terraire; lous que, mouienant que lou vi se vende e que sas rendas tomboun, s’enchautoun de tout lou rèsta. Pamens, l'amour dau païs es pas soulament l'afaire das pouètas e das artistas; es tamben lou debé das omes de traval e d’acioun. Es pas lou tout que nosta terra siègue bella, la voulèn richa e prouspèra; noste patrioutisme miejournau demanda pèr acò la coulabouracioun de toutas las energias e de toutas las capacitats. 

Demanda, pioi, que lous omes marcants qu'unirà un prougrama de respelida lou sachoun faire respetà pèr lous pouliticaires. Lous omes poulitics, couma n'i a, qu’an l'ime de prene counsel proche daumounde coumpetent e de servi emé devouament e ativitat lous grands interèsses generals, an drech à nostes coumpliments. Lous pouliticaires que parloun e desparloun à tusta-limbusta, ou que passoun soun tems à empusà l'isagna e l'ahirança de las passiouns eletouralas, fan un triste mestiè que déuriè, se la guerra nous a aprés quicon, pas pus troubà de praticas. Mès es pas dich que la guerra nous ague aprés grand causa! En tout cas, jusquas ara, sustout en ce que pretoca nosta regioun, lou prougrama Lemery de resurrecioun maritima a pas troubat dins las assembladas publicas lous aparaires afeciounats e elouquents qu'auriè agut de besoun. 

E a pas troubat nimai, hou cau dire, l'argent que i auriè caugut. A agut lou mau de toutas las grandas entrepresas endustrialas, vitimas d'una ourganisacioun financièira malastrousa, que la França es soula à subi. N'abèn dich un mot i a quauque tems, e nous ié caudrà tournà, soulide. Noste sistèma de bancas sembla fach esprès pèr arrouïnà lou païs: la centralisacioun, aqui mai, a fach soun obra de destrucioun. 

A engrunat lous tres-quarts e passa de las pichotas bancas qu'ajudavoun lou coumerce e l'endustria de ses regiouns. Pioi quand touta la fourtuna naciounala, à quicon proche, es estada amoulounada dins lous nouvèls castèls-forts de tres ou quatre nauts barouns de la finança, l'an prestada à drecha, à gaucha dins d'emprounts de Pamparigousta ou de Mascoulhouna:, ou d'emprounts rùssis, que ioi lou goubernament es oublijat de n'en pagà lous interèsses... de nostes sòus. Dins aquel tems, à fauta d'argent, d'aquel argent que degalhaven à l'estrange, noste coumerce e nosta endustria s'anequelissièn, nosta marina agounisava, abian, d'un pauc mai, lous pus trassas camis de ferre d’Europa, de canaus à la moda de i a tres cents ans, de milhouns d'energia eletrica estrassada, etc... 

Es pas permés qu'acò dure. Acò durara, pamens, tant que lou fetichisme de Paris??? esbarlugarà couma un miral de lausetas, tant que lou poufre parisenc nous jucarà la mesoula das osses. Nous cau sourti d'aquel aflaquiment, e ourganisà las forças vivas dau païs sus toutes lous terrens d'ativitas. Hou cau pèr noste aveni sus l'aiga couma pèr noste aveni???. 

Febriè 1918. 

*+*+*

ENCARA NOSTE AVENI... SUS L'AIGA... 

Sus aquel sujèt, es pas un mot mès dèch, mès cent, que caudriè ajustà à moun article de l'autra quinzena. Aquelas idèias sount d'idèias dins l'èr; baste que siègoun pas d'idèias en l'èr e qu'arriboun lèu à-m-una realisacioun. Pas pus tard que lou 18 de febriè, parlant de La politique méditerranéenne, M. Camille Devilar escriviè dins Le Rappel: Le rôle de la Méditerranée est plus vaste encore. Les Marseillais disent avec un légitime orgueil que la Canebière est incomparable parce qu'elle est la première avenue de la route des Indes. C'est vrai. 

Toute la politique de l'Extrême-Orient, celle du Pacifique dans son ensemble sont commandées par les directions que nous saurons établir et maintenir dans notre politique méditerranéenne. 

... La vie de la Méditerranée, c'est la vie de la France, car notre grande artère est là, non pas ailleurs. La vida de la Mar Latina es la vida de la França... Pensan qu'aquela veritat serà coumpresa pèr M. Bouisson, naut e nòu coumissàri à la marina merchanda: M. Bouisson es deputat de Marselha, e sauprà saique predicà pèr sa parroquia. Mès sèn pas das que cresoun que lou goubèr tout soul pot tout ce que vòu, sans la voulountat e l'ajuda das interessats. Urousament qu'à Marselha aquela voulountat e aquela ajuda das interessats desfautoun pas. 

Ausan pas afourti qu'es ce mèma dins noste Bas-Lengadoc. Vesèn pas trop quau se boulèga en favou de Ceta. Sabèn pas trop couma serà aculida l'urousa iniciativa presa pèr M. Pèire Cassan, au noum de la Cambra de Coumerce de Narbouna, en favour d'aquel Canau de las Dos-Mars que fariè de l'Aquitàni lou païs ufanous entre mila... Hou sabèn pas; hou veiren. 

*+*+*

... E EN QUICON MAI. 

Mès ce que sabèn e vesèn es que l'autre grand canau dau païs nostre, lou qu'esista dejà e que porta lou noum dau Miejour, toujour neglegit, es encara liont de rendre lous services qu'on n'en pourriè tirà. Es dins un journal de Lioun qu'abèn pescat la nouvella qu'un batèu à vapou, l'Hérault, veniè de faire lou viage de Bourdèus à Marselha. Se las causas marchavoun couma se dèu, aquel esemple proubant déuriè pas èstre citat couma una remarcanta e trop rara ececioun. 

Quauques-uns, que nous fan l'ounou de nous legi sustout pèr s'oufri lou plasé de nous criticà, nous trataran belèu de pantaiaires:

— Cresès, de bon, que siègue tant qu'acò poussible, lou reviéure d'aquela navigacioun? 

Oi. Perpé pas, après tout? S'es vist de causas pus estraourdinàrias. Diguen-z-hou carrament: ce que jusqua-z-ara, a lou mai empachat aquel reviéure es l'oupausicioun de las grandas coumpaniès de camis- de-ferre. Pèr la gracia de l'argent, elas an touta força e tout poudé dins lous estages ounte se fabrica la lèi que nous regis e nous cougis. Regardavoun lous canaus couma de councurrents dangeirouses, e alors... 

S'agiriè que lous regardèssoun, ara, couma d'ajudaires e d'assouciats. Seriè be poussible d'establi entre lous uns e las autras una coulabouracioun, mèma financièira, couma n'i a entre tant d'autras grandas entrepreses, minas e fargas, pèr esemple. 

Ou encara couma la que vèn d'interessà quauques grosses establissaments d'endustria dins lous afaires d'una de nostas bancas las mai counougudas; l'an sauvada de la quincanella; ben entendut, ié faran pagà aquel sauvage, e serà justicia. Serà pas malurous que l'argent francés servigue enfin à l'endustria francesa: serà malurous soulament pèr lous courratiès sans vergougna que lou vendièn à l'estrange mouienant una bona cousteleta. Mès, d'aqueste moument, abèn quaucun mai qu'eles à plani... 

Mars 1918. 

*+*+*

Favier : La Roso

La Roso 

Dins noste bèu païs de Prouvènço, au pèd dis Aupiho roso lou matin, vióuleto lou sèr, dins li mas coume dins li ciéuta, is enfant curious de saupre d'ounte vènon, la coustumo es de dire: 

— D'ounte vènes, bello mignoto, vos lou saupre? 

eh! bèn, escouto: I'a d'acò sièis printèms, èro la fièro de Bèu-Caire. Ta maire e iéu nous permenavian countènt, lou pouchoun bèn garni. D'eici, d'eila, uno troupo d'arlèri tambourinavo, cridavo, troumpetavo. Erian en plen revoulun de pople, de marchand, de soudard. Li jouvènt, en pleno flouresoun, dansavon, cantavon, quilavon de plesi. Dins un grand cièri, cacalucha de mounde, de brau, negre coume l'infèr, coucardo cremesino sus lou su, boumbissien, ferouge, sus lou fin gravié de l'areno. E li droulas, li bèu droulas, taiolo au vènt, camiso estroupado, lou front bagna, courrien sus lou bestiàri e, d'un tour de man, entre li dos bano, coume en jougant, derrabavon la coucardo is aplaudimen d'un pople fòu de joio. Plus liuen, un derrabaire de dènt en raubo roujo, couifa d'un capèu d'astroulò, vendié soun elissir. Eici, de dono napoulitano, fasien en cantant, trefouli li cordo d'uno mandoulino. 

Eila, uno troupo d'acroubate lougié coume d'aucèu, muda de sedo blanco cuberto de pampaieto, fasien de saut, de viravòut; pièi, lou cors gibla, boumbissien subran, viravon dins l'aire uno fes, dos fes, e, coume de cat, retoumbavon sèmpre sus li pato, is iue di gènt esbalauvi. Li chatouno lis aurien manja! Mai, subre tóuti, dins sa tèndo en sedo verdo, coume un soubeiran, un grand oumenas de Mouro, la caro limounouso, lis iue enfiouca souto li parpello negro, li 

labro espèsso e cremesino, à mié jasènt sus un mouloun de tapis dóu Levant, tubant soun narghilé, inmoubile e seren coume uno divinita, nous fissè longamen. 

Sabes dequé vendié? Un pau de tout. Dins sa boutigo, dins sa tèndo pulèu, i'avié d'anèu nouviau, de pendènt, de coulié de perlo, de taiolo de sedo dins un caire; dins un autre d'arange, de dàti, de pebre, d'encèns, de fiolo de perfum: tuberouso, jounquiho, vióuleto e, sus lou mitan, à viste d'iue, souto la man, pèr dire ansin, uno garbo de flour, garbo meravihouso de roso dóu Levant. Oh! d'aquéli flour! Li vese encaro, tè! Roso d'amour, roso coulour de ciro emé, dins lou founs dóu vasèu, uno póusso enrouselido coume la car d'uno mignoto. D'àutri d'un velout cremesin, e d'àutri d'un jaune de safran e talo qu'un or noun lavoura. Li bèlli flour! Subre tóuti, uno, espetaclouso, giganto, roujo coume un soulèu couchant, un roubin anima, uno gèmo sènso pres, ma bello, talamen que, sesi, fernissènt, faguerian au Mouro:  

— Quant n'en demandes que?  

— Lou pache coumpli, countènt, nous entournerian au mas, Miracle! L'endeman matin, à l'aubo levado, espanta, atupi, sèns paraulo, dins la bello roso atrouverian, dequé? Te lou baie en milo... 

— Un pichot tresor d'enfantoun, bèu coume lis amour, pas plus gros qu'un pese. 

— Èro tu, mignoto.  

Aigremont - Gremoun : fête de la circulade - acampado Ceveno Prouvènço2014 / P Bigot : MÏOUN

*+*+*

à M. Melchior Doze, pintre. 

MÏOUN 

Aviès nòu an, iéu n’avièi vounze. 

Quand venguères resta au quartié, 

M’ère fa mau em’un arounze, 

Moun dèt sannavo e me cousié... 

Me pensères de ti maneto 

Em’un cantoun de toun foundau. 

Quand touquères, Mïouneto, 

Sentiguère pas pus moun mau... 

Moun poutoun, au mitan dóu branle, 

Desempièi te manquè jamai, 

Moun sang landavo e venièi panle 

Quand embrassaves quaucun mai. 

En me sourtissènt ta lengueto, 

Emé la tèsto pèr coustat, 

Que m’as fa bisca, Mïouneto, 

Quand me disiès: -Te vole pas! -

Pèr te cerca li flou qu’aimaves 

Aurièi balouta tout lou jour, 

Se risiès, risièi, se plouraves, 

Mis iuel se negavon de plour. 

Di premièiri margarideto 

E di boutoun d’or bèu premié, 

Qu’ère countènt, o Mïouneto, 

Quand poudièi te faire un coulié! 

E t’anave pesca de loco, 

E t’acassave de cri-cri, 

E se vouliés de belicoco, 

N’aviès n’en vos n’en vejaqui. 

En apounchant ti dos bouqueto, 

S’en fougnant m’aviès di: -Nenet, 

Vole la luno!... - O Mïouneto, 

I’aurièi apara moun bounet. 

Ères i sorre, à l’Esplanado, 

Moun escolo èro liun, mai pièi, 

Pas pus lèu cinq ouro sounado, 

Me boutounave e courissièi... 

T’arrapave vers la foneto, 

Boufave, n’en poudièi pas pus, 

Mai qu’ère fièr, o Mïouneto, 

Fièr de m’acoumpagna’mé tus. 

Vers lou carrau grand coumo un Rose, 

Nòsti dos biasso mesclavian: 

Tus aviès de pan e de nose, 

E iéu de nose emé de pan. 

Me fasiès dire, sus l’eireto, 

Notre Père, avans de gousta: 

Se iuei pregue Diéu, Mïouneto, 

Tus m’as aprés à lou prega. 

Coumo avèn fa bisca, pechaire! 

Ta grand en ié bevènt sis iòu, 

Que de barrielo d’amoulaire 

Avèn destapa, lou dijòu! 

D’un chin, d’un cat, d’uno brouqueto, 

De pas rèn, rire que riras...

Oh! quand sian jouine, Mïouneto, 

Qu’avèn fa de bon cacalas! 

Aro, i’a forço diferènço... 

Mai lou Bon Diéu siegue beni! 

Au sourèl de la souvenènço 

Ço qu’es liun sèmblo pus poulit. 

Mai que de laie, pechaireto! 

Que de penasso dins vint an... 

Quante dóumage, o Mïouneto, 

Que sieguen pas toujour d’enfant! 

- - - 

Bigot : LOU CHAINE E LOU RAUSET

à l’eicelènt coumique Martin 

LOU CHAINE E LOU RAUSET 

Fablo imitado de La Fontaine 

Savès bèn lou Cros di Canard? 

Eh bèn! passa d’eila, mountas lou boulouvard, 

Seguissès tout de long lis aubre e li lanterno, 

Pièi, quand sarés gandi vis-à-vis li Caserno, 

Sus la drecho, en virant, prenès 

Lou cantoun dóu camin d’Uzès... 

Quand aurés camina coumo dirias dos ouro 

Dins li clapas de pèiro e li bartas d’amouro, 

Gachas, arrivarés enfin 

I vigno dóu Mas de Blasin. 

En esfatant l’ermas que toco la grand vigno, 

L’an de delai, Matenco, e Janot dóu Bouril, 

E lou Grava de Casso-Gril, 

-Tres losso qu’aimon mai la car que li espigno, - 

N’entendeguèron uno... Oh! mai, que crèmo au lum, 

D’un pastre que segu n’es pas la mita d’un. 

Boutas, s’hou cresès pas, vous farai pas la guerro, 

Countarai ço que m’an counta, 

Vous dirai pas 

S’es messorgo o s’es verita, 

Car i’a pas vist soun batistèro. 

-Un Chaine, ancian luchaire, e faisur d’embarras, 

Long d’un bos, au cagnard, se crousavo li bras 

E fumavo sa pipo en regardant sa terro... 

Segu, prechavo pas misèro! 

Basti coumo uno tourre, estanlavo au sourèl 

Soun esquino de brau, soun vèntre, si boutel, 

Sa caravato roujo e sa chèino de mostro. 

-Tout d’un cop, davans el, à quàuqui pas se mostro 

Un Rauset, tafataire, en trachelant vengu 

Au sourèl grignouta soun crouchoun de pan du. 

Es que pareissié pas trop bèn dins sis afaire: 

Sa camiso sourtié de si braio, pechaire!

Rebalavo la grounlo, e, coumo fasié fre, 

Euh! batié la semello en boufant dins si det. 

Tout frounzi, verd de la cisampo, 

Èro aqui, maigre e long, souto l’auro gimbla... 

Lou Chaine lou devisto: -Hola, ço dis, hola! 

Quinsard! Parèi que vos pas empougna li Rampo. 

Tires d’aigo, quinsard! Mai te plagne, crèis-hou, 

Long coumo un jour sèns pan, fla coumo l’amadou, 

Lou sourèl te rabino e la pluejo te bagno, 

La pus pichoto auro te lagno, 

Tout te sèmblo tempèsto e fas toujour lou cro, 

Iéu rèn me gimblo pas, sièi ferme coumo un ro, 

E quand l’auro, em’un brut de vièio pouso-ranco, 

S’acousso sus mi branco, 

Me quihe sus mi cambo, e tóuti si foutrau 

Me fan pas mai branla que l’alen d’un mouissau. 

Rejetoun agani d’un paure escoubihaire, 

S’aviès agu lou biais de mièl causi toun paire, 

S’ères soulamen moun vesin 

D’aquesto ouro sariès pas miserable ansin, 

Auriès à moun oustau lou bos e la candèlo. 

E rabalariès pas ti grounlo sèns semello, 

Sus lou bord di valat, dins tóuti li carrau, 

Sariès pas mai espés mai ti pèd sarien caud. 

-’Trei, respond lou quinsard en aussant soun esquino, 

Tout en plantant si det jala 

Dins lou cros de soun estouma, 

-Sièi paure, es vrai, e ma babino 

S’ouncho mai i caulet qu’i gigot de moutoun, 

Davans l’auro me gimble e tramble coumo un jounc, 

Mai de moun paure paire ai après la sciènci 

De pas m’enredesi contro li circounstènci. 

De fes me coche sèns soupa, 

Mai save que pèr iéu lou four coi pas li tourto: 

Me gimble, mai me cope pas! 

Vous, quauco uno vous sara courto. 

Ah ça ‘nen, adiéussas! E maio... 

E pas pus lèu 

Qu’a vira lou cantoun, uno aurasso se lèvo, 

S’acousso sus lou Chaine, en bramant lou soulèvo, 

Ié fai lou tour de bras: -Ai! Isso! -Pataflèu!

Noste Chaine carnu faguè la viro-passo, 

L’auro l’espandiguè rede-mort sus la plaço. 

Lou rauset, pèr se lèu gimbla, 

Empougnè ‘n tour de col, mai i’aguè lèu passa. 

Eh bèn! gachas, acò fai vèire 

Que de si quàuqui sòu fau pas jamai se crèire, 

Que lou tèms viro, e que l’argènt 

Chanjo de pocho bèn souvènt. 

Que i’a ‘n tas de rascas, euh! que fan bèn si crano, 

E que se d’un moustas ié frisavias li dènt, 

Virarien coumo de campano, 

E que devèn nous countenta 

D’arencado, quand poudèn pas 

Manja de perdical. Qu’au traval, à la peno. 

De bono ouro devèn plega nosto coudeno, 

E que, pèr travessa nòsti meichant camin, 

Gachas, vau souvènt mai d’esclop que d’escarpin, 

Que, quand lou meichant tèms nous meno à fouet de posto, 

Vau mai courba lou front que se roumpre li costo! 

- - - 

Tellier : LOU CANARD AS NAPS

LOU CANARD AS NAPS

O! un canard emé de naps, 

Es pas michant quand es pla fach! 

Lou difficile, es d'ourdinari, 

D'aveure tout lou necessari! 

Mès vous vau dire dins un mot 

Coussi se fai aquel fricot. 

Jusqu'au moument de la sentença 

Vostre canard fai astinença. 

Coumensas dounc per vostres naps, 

Rasclats, lavats, entoupinats, 

Fasès bouli mièja-journada. 

Quand soun venguts en marmelada, 

Voujàs acò dins un grand plat 

Couma se fai dau cervelat. 

Per ie douna bouna figura, 

Metès dessus quauqua raspuro, 

Laissas frechi una oura e quart, 

E n'arribas vostre canard! 

Quand a finit de faire fèsta 

Venès, e ie coupas la tèsta, 

Vite, vite, l'esploumassas, 

Lou doubrissès e l'embounnas. 

De lard, fasès, sa matelota, 

E lou metès dins la cocota. 

De fioc dejoust, de fioc dessus, 

E vira, vira, dins soun jus. 

Quand es roussèl, que fai boutiola 

Poudès servi vostra bestiola. 

Res de milhou, quand es pla fach, 

Qu'aquel canard eme de naps. 

*+*+*

Antounin GLAIZE : GRAMACI A LOUVISET DE ROUMIEUX

Daudet et Roumieux en conversation

GRAMACI 

A 

LOUVISET DE ROUMIEUX 

La cantaren ta cansoun vivo e bello, 

La rediren tóutis à l'unissoun, 

E, pèr l'ausi, cardelino e quinsoun 

Subre li pin vendran à ribambello. 

Vai, clantira ta poulido cansoun, 

Emai seguen pas plus à Costo-bello; 

Car l'amistanço a peréu sa gabello 

E te devèn un fièr escoutissoun. 

Lou pagaren, fraire, en turtant lou vèire: 

Sèn à la vilo, aro; mai pourras vèire 

Que noste cor se l'es pas armassi... 

An! vène lèu, que, dins uno brassado 

Mai de sesoun que mi rimo estrassado, 

Pousquen au mens te dire gramaci!... 

Antounin GLAIZE. 

Mount-pelié, lou 28 d'Outobre de 1886.