F. Mistral :CHAPITRE XLVII :Faraoun douno à Jacob - la terro de Gessèn. - La famino dins l’Egito: - lis Egician au nis de la serp.

CHAPITRE  XLVII

Faraoun douno à Jacob 

la terro de Gessèn. 

La famino dins l’Egito: 

lis Egician au nis de la serp. 

1. Jóusè adounc venguè dire à Faraoun la nouvello: “Moun paire, dis, mi fraire, si fedo e si manado, emé tout ço que poussedisson, soun vengu de la terro de Canaan e se soun aplanta dins la terro de Gessèn. ” 

2. E peréu davans lou rèi aduguè cinq de si fraire, li darrié. 

3. Lou rèi ié demandè: “Dequé fasès ? ” Respoundeguèron: “Sian pastre de fedo, pèr te servi, nous-autre e li paire nostre. 

4. Sian vengu campeja dins toun terraire, pèr-ço-que i’ a ges d’erbo pèr li troupèu de tis esclau, malo-di la famino que grèvo sèmpre mai la terro de Canaan: e te pregan que nous ourdounes d’èstre ti servitour dins la terro de Gessèn.” 

5. Es pèr acò-d aqui qu’à Jóusè lou rèi diguè: “Toun paire e ti fraire soun vengu vers tu. 

6. La terro d’Egito es en ta presènci: fai-lèi abita dins lou meiour rode e douno-ié la terro de Gessèn. E s’entre éli counèisses d’ome proun engaubia, coustituïsse-lèi pèr baile à moun avé. ” 

7. Pièi après, vers lou rèi, Jóusè introuduguè soun paire e lou placè davans éu. Jacob benesiguè lou rèi. 

8. E coume aquest ié demandè: “Quant as de jour e d’an, dins ta vido ?”, 

9. Respoundeguè: “Li jour de moun pelerinage, pichoun e marrit, soun de cènt-trento an, e noun soun pervengu jusquo i jour de mi paire, i jour de soun pelerinage.” 

10. E, benesi lou rèi, éu sourtiguè deforo.

1. Basto, Jóusè baiè, à soun paire e à si fraire, la poussessioun de Ramessès, dins lou meiour rode d’Egito, segound l’ordre de Faraoun. 

12. E li nourrissié éli e touto la meinado de soun paire, ié dounant de viéure à chascun. 

13. Car dins lou mounde entié lou pan mancavo e la fam quichavo la terro, mai- que-mai aquelo d’Egito e la de Canaan. 

14. E d’aquéli païs Jóusè acampè tout l’argènt emé la vendesoun dóu blad, e l’estremè au tresor dóu rèi. 

15. E quand la pecùni manquè i croumpaire, venguè touto l’Egito vers Jóusè, ié disènt: “Douno-nous de pan: fau-ti que mouren davans tu, pèr fauto de pecùni ?” 

16. Éu ié respoundeguè: “Adusès vòsti bestiàri, e vous darai de viéure pèr éli, s’avès pas pèr paga,” 

17. Quand lis aguèron adu, ié dounè de mangiho pèr li chivau e pèr li fedo e pèr li biòu e pèr lis ase; e, en escàmbi dóu bestiau, lis abaliguè aquel an. 

18. Venguèron mai, lou segound an, e ié diguèron: “Noun celaren à noste mèstre que, l’argènt defautant, peréu defauton li bestiàri e noun ignores pas qu’,aleva nòsti cors e la terro, avèn plus rèn. 

19. Perqué dounc mouriren à ta visto? Nous-autre e nòsti terro, saren tiéu: croumpo nous pèr esclau dóu rèi e baio-nous de semenço, de pòu que, perissènt lou faturaire, la terro noun vèngue soulèbro.”

20. Jóusè croumpè adounc touto la terro d’Egito, en estènt que chascun vendié si poussessioun, pèr causo de la grand famino. E l’assujetiguè à Faraoun, 

21. Emé tóuti si pople, desempièi li darrié termenau de l’Egito enjusquo à si counfin estrème, 

22. Aleva la terro di prèire, que i’èro estado, à-n-éli, dounado pèr lou rèi; car ié fournissien, d’usage, de viéure di granié publi e, pèr amor d’acò, fuguèron pas fourça de vèndre ço qu’avien.

23. Adounc Jóusè diguè i pople: “Vaqui,coume vesès, que Faraoun es poussessour de vautre emai do vosto terro: reçaupès de semènço e semenas lou bèn, 

24. Pèr que pousqués reculi. Au rèi, de la recloto, dounarés di cinq part uno. Li quatre autro, vous li laisse pèr semena, e pèr nourri vòsti famiho emé vòstis enfant.

25. Éli respoundeguèron: “Noste salut es dlns ta man: que nous regarde soulamen lou rèi noste segnour, e countènt lou serviren.”

26. Es despièi aquéu tèms qu’enjusquo au jour de vuei, dins touto la terro d’Egito, se pago i rèi lou quint. Acò s’es fa coume uno lèi, à la reservo dóu bèn di prèire que fuguè afranqui d’ aquelo coundicioun. 

27. Israèl abitè dounc l’Egito, valènt-à-dire, en terro de Gessèn, que n’en fuguè poussessour. E i’aumentè e ié coungreiè forço. 

28. E ié visquè dès-e-sèt an; e, entre tóuti, li jour de sa vido fuguèron cènt- 

quaranto-sèt an. 

29. E quand veguè aproucha lou jour de sa mort, sounè soun fiéu Jóusè e ié diguè: “S’ai trouva gràci à tis iue, pauso ta man souto ma cueisso, e fai-me la favour, emé l’asseguranço, de pas m’enterra dins l’Egito. 

30. Mai, que iéu dorme emé mi paire; d’aquesto terro emporto-me e m’enseveliras au sepucre de mi majour.” Jóusè ié respoundeguè: “Farai ço que m’as ourdouna.” 

31. E éu: “Alor, diguè, juro-lou !” Courne Jóusè juravo, Israèl, revira vers lou cabés de soun lié, adourè Diéu. 

Yves Gourgaud : MISTRAL EROTIQUE

MISTRAL EROTIQUE

Nous nous proposons de donner à lire non des poèmes entiers, mais de courts extraits où se révèle le mieux, selon nous, l’érotique mistralienne. 

Ces extraits sont accompagnés d’une traduction qui est de notre autorité (dans le cas contraire, la traduction sera accompagnée de la signature FM pour Frédéric Mistral). 

Nous espérons que cette petite anthologie donnera envie à quelque lecteur d’entreprendre une étude sérieuse et approfondie sur le thème de l’érotique mistralienne.

Yves Gourgaud

N.B. Les extraits seront donnés selon leur longueur, les plus courts apparaissant en premier.

1

Aquéu que de la rèino a parteja lou lié,

Aquéu que dins si bras l’a tengudo e l’a torso,

Moustrara que lou rèi es aquéu qu’a la forço,

Que lou rèi es aquéu que porto lou cuissau.

Celui qui de la Reine a partagé le lit,

Celui qui dans ses bras l’a tenue, l’a tordue,

Montrera qu’il est Roi celui qui a la force,

Que le Roi est celui qui porte le cuissard ! [La Rèino Jano]

2

Lou galoubet, tambourin e clincleto

Fan sauteja li chato e li garçoun,

E li boutèu mouflet di chatouneto

Soun destapa pèr la curiouso aureto

Que, pèr li vèire, ausso li coutihoun.

Galoubet, tambourin et cliquette 

font sautiller filles et garçons, 

et les mollets bien en chair des jeunes filles 

sont mis à nu par la brise 

qui, curieuse de les voir, soulève les cotillons. 

[Poésies Inédites, page 56]

3

Teisas-vous ! Digas uno perdudo,

Au demòni d’infèr vendudo e revendudo,

Qu’a’strangla soun espous, lou paure rèi Andriéu,

Em’un las qu’elo-memo avié trena… Voudriéu

Qu’à travès Avignoun, nuso, la péu-tirèsson

E quatre chivalas, vivo, l’escarteirèsson.

Taisez-vous ! dites plutôt : une femme perdue, au démon de l’enfer vendue et revendue, qui a étranglé son époux, le malheureux roi André, avec un lacet qu’elle-même avait tressé… je voudrais qu’on la traîne par les cheveux, nue, à travers Avignon, puis que quatre chevaux l’écartèlent vivante ! [La Rèino Jano]

4

E tu, Malen, vène t’asseta’qui,

Coume la roso as li dos gauto tencho,

E ta coumpagno engardo de langui.

Vène, à plen got, me vujaras la tencho

E dins toun jougne, oh ! se siés trop restrencho,

T’ajudarai destaca ti vetoun.

Et toi, Malen, viens par ici t’asseoir, toi qui as les deux joues de la couleur des roses, car en ta compagnie l’ennui s’éloigne : viens à plein verre me verser le vin ; et si dans ton corset tu te sens trop serrée, oh ! je t’aiderai à en détacher les rubans !  [Poésies Inédites, page 32]

5 

Un pau plus liuen, Martoun cacho uno niero

Qu’a davera de soun sen blanquinèu.

De-pèr darrié, Tasto-Pousso chauriho

La rego blanco e li dous flot de nèu ;

Mai coumo vai tavaneja la fiho,

Martoun se viro e i’envisco un bacèu.

Un peu plus loin, la jeune Marthe écrase une puce qu’elle a trouvée sur son sein blanc. Derrière elle, Tâte-Nichons reluque la raie blanche et les deux gonflements de neige ; mais comme il s’apprête à lutiner la fille, Marthe se retourne et lui applique un soufflet.  [Poésies Inédites, page 48]

6

Chato de moun païs, Venus d’Arle e dóu Rose,

Permete qu’uno man de preiresso descrose

Lou jougne de toun sen : es digno mai que mai

Elo, d’ourna l’autar de la Bello de Mai

E de faire au moumen que ta centuro toumbo,

Envoula dins l’azur un parèu de couloumbo !

Jeune fille de mon pays, ô Vénus d’Arles et du Rhône, permets que la main d’une prêtresse dénoue les voiles sur tes seins : plus que tout autre elle est digne d’orner l’autel de la Belle de Mai et, à l’instant où tombe ta ceinture, faire s’envoler dans l’azur une paire de colombes !  [Poésies Inédites, page 338]

7

I son moulan de la zambougno,

Sus lou pountin dóu Tiatre, emé lou pitre nus,

Un vòu de chatouno viroulavon,

E su’n refrin qu’ensèn quilavon,

En danso ardènto se giblavon,

Autour d’un flo de marbre en quau disien Venus.

Aux sons d’une lyre sensuelle, sur la scène du Théâtre et la poitrine nue, un essaim de filles tournoyaient ; et sur un refrain qu’ensemble elles criaient à pleine voix, elles tordaient leurs corps dans l’ardeur d’une danse autour d’un bloc de marbre qu’elles appelaient Vénus. [Mirèio]

Bigot : FRATERNITA

FRATERNITA 

Jouine estrangié, mis abihage 

Soun pas coupa coumo li tiéu, 

Ti péu soun long, e toun visage 

Es pas de la coulou dóu miéu, 

Mai toun cor bat dins ta peitrino 

Pèr tout ço qu’es vrai, bon e grand, 

Au mau soulet vires l’esquino... 

-Siès moun fraire, toco la man. 

De-que cerques, panle sounjaire, 

Acrouchouni sus toun papié? 

- dins lou bonur di travaiaire 

Moun idèio cavo soun lié. 

Pousse i rodo pèr que chasco ouro 

Porte un pau de joio e de pan 

A quau trimo, patis e plouro... 

-Siès moun fraire, toco la man, 

E tus, bon vièl à la barbo griso, 

Sèmblo qu’aissejes, de que vos? 

-Seguisse la lèi de Mouïso, 

De crestian m’an roumpu de cos.

Se li paire an fa mau, m’estoune 

Qu’on trague la pèiro is enfant, 

-Siès moun fraire, toco la man. 

Iéu, dins nòsti desert de sablo 

La miejo-luno fai la lèi. 

Lou Bon Diéu, souto nòsti fablo, 

Se mostro un pau aro, un pau pièi. 

Crese qu’aima vau tout sus terro, 

Car ome rouge, negre, blanc, 

Sèn lis enfant d’un meme Pèro... 

-Siès moun fraire, toco la man. 

-Iéu dins ma man tène l’espaso, 

Fau la guerro en aimant la pès: 

I pople qu’un tiran escraso 

Porte secous, me pause après. 

Dessus ma tèsto uiausso e trono, 

Ai pas pòu, vau toujour avans 

S’un cris de liberta me sono... 

-Siès moun fraire, toco la man. 

Iéu, pechaire! ai uno famiho, 

Entre pensamen e rambal, 

Abarisse garçoun e fiho, 

Cor au bèn e tèsto au traval. 

Ié dise: -Laissas li batèsto, 

Is iuel de Diéu, rèn vau pas tant 

Qu’un cor bon, uno vido ounèsto... 

-Siès moun fraire, toco la man. 

*+*+*

Peise : CHANT NATIOUNAU DE LA PROUVENÇO

CHANT NATIOUNAU DE LA PROUVENÇO 

Chanté par M Paul BOYER, du Gymnase de Marseille 

dans “M. Arléri”, opérette en un acte 

Musique de HUGH CAS. 

La countrado ounte ai pres neissenço 

Semblo lou paradis per iou; 

La bello terro de Prouvenço 

Es un peÏs benid de Diou. 

Sa mar es toujours bello, 

Soun souleou toujours d’or, 

Et la terro per ello 

Escam po soun tresor. 

Dins la coualo embeimado 

Caussigaz que de flours, 

Et dins la valounado, 

Troubaz à chasco piado 

Un nis per leis amours. 

La countrado ounte ai pres neissenço, etc. 

De Franço la courouno 

A pas plus fin diamant; 

Soun esplendour li douno 

Un trelus plus brilhant. 

Seis enfants, dins l’histori, 

N’an pas gès de rivaus..... 

A Paris, per sa glori, 

Aquelleis que fan flori 

Qu soun ? de Prouvençaus! 

La countrado ounte ai pres neissenço, etc

As tout per tu, Prouvenço!.... 

Un ciel toujours seren; 

Pouesio et scienco 

Grilhoun dedins toun sen. 

Teis filhettos soun bellos, 

Teis jouvens courageous, 

Teis flous toujours nouvellos , 

Teis vertus eternellos 

Et teis vins generous. 

La countrado ounte ai pres neissenço, etc. 

Per tu, vieilho Marsilho, 

Que trioumphe esclatant!..... 

Lou mounde se revilho 

En entenden toun chant. 

Quand l’ennemi s’avanço, 

Aqueou chant redouta 

Resclantis! et piei lanço 

Leis enfants de la Franço 

A l’immortalita!!!..... 

La countrado ounte ai pres neissenço, etc. 

- - - 

P. Bigot : L’ENFANT DEGAVAIOUS

L’ENFANT DEGAVAIOUS 

Parabolo de l’Enfant proudigue 

-Que l’èr es fres, coumo fai bon, 

O ma grand! encaro ai pas som. 

Vejo coumo la luno es claro, 

Souto la triho de l’oustau 

Vène emé iéu t’asseta ‘n pau, 

Nous anaren coucha tout aro... 

Vène, ma grand, - me countaras 

Uno istòri, la que voudras, 

Un de ti conte bèu e tèndre 

Que soun toujour li bèn-vengu, 

Qu’uno fes qu’on lis a ‘ntendu, 

On li voudrié toujour entèndre. 

-E ma pauro grand m’escoutè. 

Sus noste taulié s’assetè, 

Noun, jamai rèn me refusavo. 

Me i’agenouière davans, 

E prenguè ma pichoto man 

Dins sa vièio man que tramblavo, 

E me diguè: 

-Liun, liun, dins l’estrange païs, 

Un meinagié brave e pas chiche 

Aviés dous grand garçoun. Èro vièl, èro riche, 

E vivié sèns rebaladis.

Un jour qu’èro souto sa triho, 

Lou pus jouine de si garçoun 

S’aprocho d’el, e, sèns façoun, 

Ié dis, lou capèl sus l’auriho: 

Moun paire, lou mestié que fau me counvèn pas, 

Trovo que la terro es trop basso. 

Dóu matin jusqu’au sèr, rebale ma carcasso. 

À la terro, à la vigno, au prat, 

Dins iéu i’a ‘no voues que me crido: 

-Manges en erbo toun bon tèms. - 

Baio-me ço que me revèn, 

Iuei vole joui de la vido. 

Lou paire estoumaca ié fai: -Mai, moun enfant, 

Mai de que penses? Vos dounc faire 

Davala au cros toun paire avans l’ouro, pechaire! 

Agues pieta de mi pèu blanc. - 

Tout seguè resoun inutilo. 

Lou paire partajo soun bèn, 

Lou garçoun pren sa part, la vènd, 

Empocho sa mounedo, e filo..., 

Zou! riboto d’eici, zou! riboto d’eila, 

Meichanto coumpagno, jo, fèsto, 

Nosto galo-bon-tèms jougavo de soun rèsto! 

L’argènt filavo que noun sai! 

Seguè lèu à bout de ressourço. 

Adiéu argènt, bonsèr plesi, 

Veguè lèu pas pus sis ami, 

Quand veguè lou founs de sa bourso. 

Pamens, falié manja. Noste gandard, alor, 

Vai, nus e crus, afama, panle, 

Se louga dins un mas. -En lou vesènt tant sanle, 

Ié faguèron garda li porc. 

Manjavo pas sa miejo vido, 

De castagno ranço arriba, 

Quand li porc n’en voulien pas cap, 

Quand li chin li avien chaupido. 

Un matin ço diguè, dins sa jasso espandi: 

-Aval, li varlet de moun pèro 

An tout ço que ié fau: pan, vin, poumo de terro, 

E iéu crèbe de fam eici...

Fau qu’ane à moun paire, de sorto 

Qu’à si genoul me jitarai, 

-Ai tort, moun paire, ai tort, es vrai, 

Pamens, me barres pas ta porto. 

Sièi pas toun fil, pren-me pèr ouncha ti soulié, 

Merite pas que ta coulèro. - 

-E s’aubouro, e camino, e vai trouva soun pèro... 

Lou vièl revèn de soun plantié 

Vèire soun einat que lavouro, 

E soun jouine, lou paure enfant, 

Lou devisto, ié vai davans, 

I’embrasso si genoul e plouro... 

-Moun paire, ai tort, es vrai... - Lou vièl, en l’entendènt 

Recounèis soun enfant, l’embrasso: 

-Es tus, moun fil? Es tus... O moun Diéu, quanto graço! 

Moun fil èro mort e revèn. 

Zou! qu’avèn pas de tèms de rèsto, 

Sougnas lou soupa que se coi, 

La brocho au fiò, lougas l’aut-boi, 

Que tout moun oustau siegue en fèsto. - 

Lou paire, plen de joio, à soun enfant carguè 

Vèsto, mostro en or, boto fino, 

E lou fum di gigot rempliguè la cousino... 

L’einat, jalous, lou sèr venguè, 

Voulié pa’intra. - Tant lou poussèron, 

Tant soun paire i’anè parla, 

Que finiguè pèr s’ataula, 

E jusqu’au jour se regalèron. - 

-Ma grand se pausè ‘n pau, pièi, me diguè: « Pichot, 

Vejo, quand saras grand, óublides pas acò: 

Languitude e malur s’estacon sus la terro 

A l’ome liun de Diéu, à l’enfant liun dóu pèro. 

L’ome liun dóu Bon Diéu, es l’ome que fai mau: 

Qu’on siegue catouli, que l’on siegue iganaud, 

Quand à faire lou bèn l’on plego pas sa vido, 

La Biblo sauvo pas, nimai l’aigo benido. 

Pèr èstre enfant de Diéu, moun fil es pas besoun 

De chanja de mestié nimai de religioun,

Escoubihoun de glèiso, escoubihoun de tèmple, 

Di bòni qualita soun pas toujour l’eisèmple. 

Èstre emé Diéu, vòu dire èstre brave pertout, 

De marcha counfiènt, sèns brounca, jusqu’au bout, 

Dins la draio destrecho, espignouso, empeirado, 

Ounte lou fil de Diéu a marca si penado. 

- Lèu lou Bon Diéu me levara d’eici: 

Iéu vau pausa lou fais, tu lou cargues, pechaire! 

Se dins ta vido aviès envejo de mau faire, 

Souvèn-te de ta grand, e sounjo, moun ami, 

Que lou Bon Diéu te vèi e que deves mouri. - 

*+*+*+*

Peireto Berengier : Racine à Uzès

Racine à Uzès

La viloto de la Gardounenco es proun fiero d’agué agu Racine dins si bàrri e manco jamai de lou faire saupre. Mai que ié venguè faire, à Uzès, lou parisen pancaro couneigu ?

Sabèn qu’èro encò de soun ouncle lou R. P. Sconin vicàri generau de l’evèsque, óuficiau e priour di Génovéfains dóu chapitre catedrau, tre lou 8 de nouvèmbre de 1662 e que, jouine e aclapa de dèute, cercavo d’agué uno situacioun e un benefice eclesiasti. Se devié dounc d’èstre serious e de causi li libre que falié. Vai ansin qu’estudio la Biblo e Sant Toumas e que meno pas la grando vido qu’un jouine parisen aurié pouscu mena. Souvènt counvida, refuso coume refuso tambèn de sourti d’escoundoun. Vòu èstre ounèste emé soun ouncle e subre-tout fai mèfi de soun image. Finoche, coumpren lèu la situacioun de soun parènt e li proublème qu’a emé soun ordre (Es lou tèms de l’afaire de Port-Royal e di Jansenisto). Vòu pas èstre un proublèmo de mai e subre-tout vòu coumprene l’istòri, la vido, e faire avans. I’a pamens de moumen que ié fau faire l’ipoucrite e escoundre sis idèio anti-jansenisto, si critico fèro à l’encontro di Jesuisto o engaugna l’indiferènci pèr li chato. Sa courrespoundènci mostro un jouvènt atentiéu is ami, soulet, e que demando souvènt d’ajudo e de sousten mourau. Dins si letro (un trentenau) gardo lou souveni di chato couneigudo à Paris e parlo di chato d’Uzès e dóu païs sènso fausso pudour. Aura lèu soun proun de l’ipoucrisìo e lou priéurat tant souveta (pèr li benefice qu’adurrié) en se fasènt trop espera, Racino torno à Paris vers la fin de 1662 vo la debuto de 1663. Aqui couneitra lèu lou sucès literàri e roumpra en plen emé Port-Royal. Soun sucès literàri, se poudèn toujour dire que soun sejour souto noste soulèu i’es pèr quicon…

Lou « touristo » e la lengo

« Le ciel est toujours clair tant que dure son cours

  Et nous avons des nuits plus belles que vos jours ».

Racino fuguè dubert à tout ço que vesié à soun entour : óulivo, areno, chato poulido. Saup s’asata à l’endré maudespié la marrido sesoun que i’arribo. Lou mai gros proublèmo sèmblo d’èstre la lengo e sabèn proun l’istòri di brouqueto. En agènt besoun de « clous à broquettes » n’en mando croumpa e ié raduson de « brouqueto », coume en demandant un quèli se vèi adurre un rescaud… D’aiours, es tre agué passa Lioun qu’avié coumença de plus gaire « entendre le langage du pays, et à n’être plus intelligible moi-même […] Mais c’est encore pis en ce pays. Je vous jure que j’ai autant besoin d’interprète qu’un Moscovite en aurait besoin à Paris […] Cela irait à l’infini si je voulais vous dire tous les inconvénients qui arrivent aux nouveaux venus en ce pays comme moi. » Pecaire d’éu ! Pamens mancara pas d’acaba si letro pèr un poulit « Adiousias ». Parié quand li gènt dóu païs ié fan de bèu-bèu ; ié saup respondre que pèr de reverènci « Car je n’entends pas le Français de ce pays et on n’entend pas le mien ». Lou paure Racine n’es regretous qu’a pau d’èstre pres pèr un « incivil » o « un homme non lettré » subre-tout qu’a remarca qu’au nostre belèu mai qu’en Itàli, li civilita e li ceremounié soun en usage… S’espanto de vèire li darrié di païsan faire de reverènci coume à la cour e « Outre cela ils causent des mieux, et pour moi j’espère que l’air du pays me va raffiner de moitié, pour peu que j’y demeure, car je vous assure qu’on y est fin et délié plus qu’en aucun lieu au monde ».

Urousamen que se fara. Quauque tèms pièi escriéu : « Je suis en danger d’oublier bientôt le peu de Français que je sais, je le désapprends tous les jours et je ne parle tantôt plus que l e langage de ce pays, qui est aussi peu français que le bas-breton ».

Lou païs

« Nous appelons ici la France tout le pays qui est au delà de la Loire ».

Mai lou païs i’agrado. Uzès es bèn situado e n’en poudès faire lou tour à pèd se. « Les campagnes qui l’environnent sont toutes couvertes d’oliviers, qui portent les plus belles olives du monde, mais bien trompeuses pourtant. » Verai que, groumandas, n’en vouguè tasta e « J’en eus la bouche perdue plus de quatre heures durant ». Re-Pecaire ! Mai gaire rancurous, tasto l’òli d’óulivo inquiet e « sans mentir il n’y a rien de meilleur ».  

Es un pau estouna que li lego agon pas la memo mesuro qu’en Franço : « Nîmes est à trois lieues d’ici, c’est-à-dire sept ou huit bonnes lieues de France » e fau rèn dire dóu camin qu’es diabouli. La vilo i’agrado, la trobo « aussi belle et aussi “polide”, comme on dit ici, qu’il y en ait dans le royaume ». Li chato ié soun tant agradivo coume à Uzès, meme pèr lou fiò d’artifice, à la lusour di fusado, n’i’a pas uno qu’aurié pas vougu ié faire coumplimen !

Lou tèms que fai lou desvarìo un pau e la vegetacioun : « On m’a même dit qu’il y avait un jardin tout plein de roses mais de roses fleuries à une lieue d’ici. Et cela ne passe pas même pour une rareté ». (Aquelo letro es datado dóu 3 de febrié !). S’estouno tambèn que lou printèms sigue tant abouriéu emé de pese e de cerieso en mars.

Li recordo soun bello e noto que ligan li garbo à flour e mesuro, ansin pas un gran de perdu. Tant lèu coupa, tant lèu depica. Mai se li païsan se satiron en plen soulèu « je ne pourrais pas être un moment dehors sans mourir ».

Miés que l’òli, nòsti chato 

 « On m’en avait dit beaucoup de bien à Paris, mais sans mentir on ne m’en avait encore rien dit au prix de ce qui est, et pour le nombre et pour leur excellence. Il n’y a pas une villegeoise, pas une savetière qui ne disputât de beauté avec les Fouilloux et les Mennevilles. Si le pays de soi avait un peu plus de délicatesse, et que les rochers y fussent un peu moins fréquents, on le prendrait pour un vrai pays de Cythère. Toutes les femmes y sont éclatantes, et s’y ajustent d’une façon qui leur est la plus naturelle du monde. Et pour ce qui est de leur personne : “Color verus, corpus solidum et succi plenum” » (Le teint naturel, le corps en bon point et plein de sève).

Au contro, li gènt en generau i’agradon pas e li jujo mau : manco de paraulo, manco de fidelita « […] tant les âmes de cette ville sont méchantes et intéressées ». Soun pamens proun letru subre-tout sus ço que toco la religioun e si proublèmo d’atualita, lis Uganau mai que mai « Car pour les catholiques, ôtez un ou deux de ma connaissance, ils sont dominés par les Jésuites ».

Noto tambèn quant li passioun soun forto dins lou païs « ils portent les passions au dernier excès ».

Fau reparti…

Quand avès plus lou mourau, plus rèn vous agrado e Racino escriéu lou 15 de mars de 1662 : 

   « J’irai parmi les oliviers

   les chênes verts et les figuiers

Chercher quelque remède à mon inquiétude

   Je chercherai la solitude

   Et ne pouvant être avec vous

Les lieux les plus affreux me seront les plus doux. » 

e meme li chato… Tout d’uno i’a quàsi plus que « des beautés fort communes ». Se coumpren que la malancounié lou prenguèsse e l’idèio de tourna dins soun Paris. Aura pamens aprés un pau de lengo nostro e belèu endrudi soun francés…

Peireto Berengier

*+*+*+*