MARSYAS 2

samedi 16 novembre 2013

J. Castagno : SIMOUN lou Carbounié - part V à VII - fin - (DRAMO DE LAS MINOS CEVENOLOS)

Mé l’esquinlo a drinda dau founs... Vòu dire: “Tiro ! “
Douçament, sans tusta, la gabiasso s’estiro,
Glissant sus lous ribans ferras dau grand póusard.
S’ausis ! Vejo-l’aici ! Se véi de lums de vabres...
S’aplanto !... Tout fernis I Regounflo das cadabres
Ramassas ailaval per Simoun... à l’asard.

Tal un glàri d’infér sort d’aqui l’ingeniaire,
Que, sans naussa la vouès, repeto: “Vite, fraires !
“ Au secous, mous amis ! Au founs Simoun es soul
“ E lou malastre es grand ! I’a ‘val de morts en colo
“ E de viéus idoulant... Es uno causo folo...
“ Vite, quau ié vèn mai ? ” La gàbio, afrous bressoul,

Es bouidado das morts... e de vint voulountàris
Se ramplis e repart as bàuris soulitàris.
Arrivo en bas. — ”Simoun ! ounte a passa Simoun ?
“Soun caléu se vèi pas ! Es-que ?...” — Mè nou, la louiro
Trauco un valat ratiè dins l’abousounadouiro;
On l’entend tafura, pestant coumo un demoun.

L’ingeniaire l’a vist. “ — Ardit, valient, courage !
“ Trauco que lous auren ! Aici vau fa ‘n barrage ! ”
“— Ié sièi, moussu, ié sièi, sente lou courent d’èr ! ”
Un roc s’es esberla; Simoun se i’encafourno,
Tustejant de pertout dins la baumasso sourno,
Sounant à plen gousiè: “ Chapou, Calvin, Couderc ! ”

“— Sèn aici !” ié respond lou troupèl en magagno;

“— Sèn rescoundus, sans lum, mè l’acido nous gagno;
“ Secous ! Pourtas secous ! ” D’un vanc Simoun couris,
E quauques pas pus liuen, dins la galariè nauto
Trovo l’amagadou e de joio n’en sauto.
“— A vautres ! Vè moun lum ! Venès toutes ! ” E ris.

Lous rescapas, febrous, un per un s’encafournou.
(D’aici, d’ailai s’ausis de roucas que s’embournou.)
Mai d’un aqui languis de vèire lou grand jour.
La causo tardo pas; la gàbio, sans calamo,
A davala, mounta, coumo s’aviè ‘gu ‘no amo:
Tout es foro dangiè sus lou cop de mièjour.

Souls, dins la niué d’au founs, Simoun e l‘ingeniaire
An resta per furga, refurga chasque caire...
Sonou... fan milo bruts... l’ecò soul restountis !
Aqui n’i’a pus d’umans ! S’ausis que la bacholo
Dau póusard misterious ounte l’aigo tracholo...
Lor s’emgàbiou per d’aut: “ Zóu, tiro I ” Soun sourtis.

Simoun semblo un danna I Béu, se lavo, s’abiho;
Mès el, tant courajous, a lou cor en douliho
E se bouto à ploura coum’un enfant penti,
Quand véi, souto l’envans la mudo tièiro-longo
Das cambarados morts qu’en jusqu’ailai s’alongo
Coum’un bàrri saunous de cadabres basti.

Mé vèn lou Direitou. Davans milo minaires
Prend Simoun dins sous bras coumo s’èro soun fraire,
E l’embrassant ié dis: “D’à-parti de deman
Simoun, oubriè d’elèi, dau chantié de La Costo,
“ Per te recoumpensa te fau chèfe-de-posto ! ”
E maugrat lus doulou toutes picou de mans.

Simoun voudriè parla... mé l’acido l’estoufo.
Bat l’èr de sous dous bras, pechaire !... e patapoufo !
Flaquis sus sous gèinouls coum’un vièl abouri.
“ Brave Simoun, de-qu’as ? ” — “ Pas res ! Tristo chavano !
“ Mè voudrièi moun fougau,... mous enfants... e ma Jano.
“ Se lous pode embrassa... caucagno de mouri ! ”

VII

L’ingeniaire a coumpres. Subro uno auto-mouvento
Fai cusca lou Simoun, e coumo uno espavento
Volou per lou camin que meno au car fougau.
Ié soun lèu. L’oustau rous lusis dins la vesprado;
Souto un bèl castagniè, la Jano acougassado
Trepo embé sous marmots risènts e fouligauds.

Mé lou brut dau tuf-tuf aplanto l’amusaio.
Ailai Simoun sourris. Per davala trantaio !...
L’ingeniaire afouga lou meno per lou bras...
E sa fenno lou vei... e tant lèu lou matrasso:
“— Fau te pourta, gusas, o quanto vergougnasso !
“ T’aime pas pus, vai-t’en I Vai-t’en ounte voudras ! ”

Simoun, lous ièls neblas, sans dire un mot, poutouno
Sous enfants adouras, sa Jano... que s’estouno,
E devigno, grand Diéu... l’abouminable sort !...
“— Paire de mous enfants, de-qu’as fa de ta vido ? ”
“— Migueto, mon devé !... Siéi acoutra d’acido !... ”

. . . . . . . . . . . . . . . . . . .

E dins l’or dau sourel coujant, s’abaucho... mort.

*+*+*

jeudi 14 novembre 2013

J. Tellier : MATIÙ DE CANTAGRILS

MATIÙ DE CANTAGRILS

Matiù de Cantagrils, Mativot per escai
Brave ome se n'ia un, e bisquant pas jamai,
Courdouniè de mestiè, e mèstre en galejada,

S’en anava au Clapas, per passà la journada.
Vai dounc prene lou trin, e pla tranquilament
S'estalla tout soulet, dins un coumpartiment,
Quanta chança soudis, escampant sa casqueta,
De pourre faire un som sus aquela banqueta,
Sera tant d'arapat, lou que vèn sera tèu,
Prenguent nostre cantou, e baissen lou ridèu!
Ailas courta illusiù, adiù la roupilhada
Car sul cop n'en mountèt touta una coutrilhada!
Un lapin dins un sac, tout quatre grands paniès,
Tres cofres a capèl, passèroun lous proumiès,
Tres dametas de toc, car n'avion la pèl ruda,
Un vielhet de boun biais, una femna barbuda.
Tout acò s'estalla sans bounjour ni boun sèr
E davans Mativot, vous an un pichot èr!
— Barras lou fenestrou, e butas la boulhota!
— Fourbias-vous un pauquet, raport a ma capota!
— Fumas pas per asard? lou fum nous fai toussi!
Avèn toutis pagat, sèn lous mèstres aici!
Deque tron es acò, d'ount vèn tant d'insoulença!
Pensava Mativot, calculant sa vengença.
E la vengença ailas, se faguèt lèu senti,
Pas que de ie pensa, me fai estrementi
Tout couma un vent foulet que monta e tourbilhouna,
Dins lou coumpartiment, un quicon empouisouna!
Ah Messieus! quanta audou! quant ourrible bouquet!
Aussi das vouyajours, arrestèt lou caquet.
Chacun sans dire mot, preniò soun alenada,
N'ausissias que soupirs, seguits d'una bufada
E cadun d'espià, d'un cop d'iol amagat
Se per un cop d'asard, n'aviò pas causigat!
— Es belèu moun lapin? pensava la barbuda,
Tant ben disiò pas res, mai sièguesse lenguda.
— Ount diable sèn venguts? sèn dins quauque seignas,
Asardèt lou vielhet en se tapen lou nas.
— Me vau estabani! souscava la dameta,
Es quicon de pourrit que ia joust la banqueta!
E la que dau tabac, crentava tant lou fum,
Saviò pas per ma fe ounte penja soun lum.
Se parlava pas pus de capèls e de moda
Lous bufals, lous soupirs res n'aviò pas la broda.
Lou moucadou sul nas, lous iols sus lou quinquet
N'aurias pas counescut, lou qu'èra mai mouquet!
Tout fièr de soun sucès, e sans mai de rancuna
Matiù de tems en tems, n'en lançava qu'aucuna
Tout anava au meiour, quand dins un grand effort
Faguèt sourti lou vent, un pauquetou trop fort!
Un soun de mirlitoun, de tèla que s’estripa,
Pichot bruch que sourtis, savès de quanta tripa!
E lous empouisounats, couma de gens perduts
Se levoun en crident : — Es tu qu'as fach lou bruch!
Es tu que d'un pouisou, as troublat nostra joia,
Sourtiras pas d'aicis, sans paga la foutroia!.
Sios aici, sios alai, lou paure courdouniè
Ausiguèt lous grands mots, dau libre peissouniè.
Ah s'avias vist acò! quanta afrousa tempèsta!
Lous pèusses airissats, lous iols defora tèsta
Eme lous poungs sarrats, joust lous nas de Matiù
Crese que sans la pòu l'auriò escourchat viù.
Cugnat dins soun cantou, faguent facia a l'ourage,

A nostre amic pamens, demourèt l'avantage.

Matiù de Cantagrils, qu’es toujour boun garçou
Vourguèt faire la Pas, e dounà sa rasou.
Quand l'èr pur e fresquet ajèt calmat lous ners,
Quand lou fumet sieguèt envoulat dins lous èrs
Matiù prend la paraula, e sus un toun plouraire,
— Ah soudis, se savias, deque venès de faire!
Que lou pople es michant! quand un ome soufris,
S'enchauta de soun mau, e pla souvent n’en ris!
D'un mau tarrible ailas, m'en fasès una ensulta!
Ieu que vau au Clapas, per demanda counsulta,
Se me trapas aici, es pas per agrament,
Cresès a moun respèt e a moun sentiment.
— Au respèt ie cresen, acò d'aquis caucagna,
Mes per lou sentiment, lai i anas pas de cagna!
— M'empacha pas pamens, que moun infirmitat,
A fach vira lou sen, a nostra Facultat!
M'an oufrit cranta cops, en paguent per avança,
De me croumpa la pèl, per estudia la pansa!
Aquela infirmitat, faguèt lou pichot vièl
Dèu èstre lou rebous, d'un raumas de cervèl?
— Per ieu a moun avis, (las femnas soun pas sotas)
Es una indigestiù qu'avès, de quincarlotas!
— Pas res de tout acò, lou cas es pus serious,
Ai la pèl qu'es trop courta, es quicon qu'es afrous!
— La pèl qu'es trop courta? qu'es aquela marana?
Acò ven dau marin, ou de la tremountana?
Es un mau per ma fe, pas gaire counouscut,
Deque tron es acò, e d'ount diable es vengut?
— Acò venguèt un jour, d'un' esplausiù de pega!
Pecaire, de mous iols, gaitas la perpelega,
Per la poudre barra, es aquis l'embaras
Me cal toujour dourbi la porta de detras!
Ai la pèl de moun cors, qu'es talament tibada
Que quand barre lous iols, ia quicon mai que bada
E cresès hou au mens que l'on es dins l'emboul,
Quand per barra lous iols,... vous cal èstre tout soul.

*+*+*

mardi 12 novembre 2013

J. Castagno : SIMOUN lou Carbounié - part III & IV - (DRAMO DE LAS MINOS CEVENOLOS)

III

Mè !...
Subran, au prefouns, de-qu’es que lou pounchouno
Sans devigna perqué ?... Simoun s’en amouchouno,
Paurous e treboula, pivela sans besoun !...
N’i’en vèn de tressusous ! Que se i’a ?... Troun de lèro !
S’ausis un laid soubroun aval dessouto terro...
Un malastre ounticon, soun cor n’a lou ressoun !!!

Té ! Vè ! De-vés lou Pous aquel fumaras negre.
L’acido, segne Diéu !... E coumo es pas poudegre,
Ni ladre, ni banda, Simoun volo au secous.
Descaus, enfurouna, gardant caro de brounze,
Sauto, tal lou lioun, lous roucas, Ias arounzes,
E dins un vira d’ièl arrivo sus lou Pous.

Ourrou ! Dau toumple amar, sourno font demounico,
Mounto, traito, à plen trau, l’acido carbounico.
Davans lou flèu de mort tout idoulo, espauri !...
E siéulou las vapous, e la sirèno bramo
Sous apèls pietadous que viropassou l’amo.
Simoun pènso: Ailaval, quand n’i’a que van mouri ?

“— Quau s’engàbio embé iéu ? a crida l’ingeniaire,
“ Quau me suvis au founs? ” — Lou Simoun, sans retraire,
En pèus, descaus, s’avanço, aguent abra soun lum:
“— Sièi preste, davalen ! ” — La machinaso boufo,
La gabiasso crucis, e dins lou Pous qu’estoufo,
Tout s’enfounço, mourru, nega dins d’orre fum !

Quante briéu long de vèire ansin davala la courrejo,
E toujour ! e toujour ! Lou front n’a susou frejo.
Subran, d’un court cop sec d’aval an esquinla.
“ Arrestas ! ” acò dis... e tant lèu tout s’aplanto.
Lou silènci tèn tout. Ié soun aqui milanto
Retenguent lus alé dins lus cor empèila,

*+*+*

Ounte que siegue es bèu l’enavans dau courage:

Lou souldat valourous au miè dau mourtalage;
L’aviaire au clèl blu; lou marin sus soun bord;
Lou mège as pestilous pourgiguent soun ajudo:
L’esplouraire f urgant l’encountrado perdudo;
Lou martire en sa fé que se ris de la mort...

Toutes soun à lausa ! Mè, cabussa, placido,
Sans un ressaut de pòu dins lou toumple d’acido,
Sachent qu’on pot trouva de-bas soun orre cros,
E que lou famihau pot mouri de misèro...
Per lou devé, sans mai, s’esvali souto terro
Es l’ate subre-uman das diéus e das eros.

*+*+*

dimanche 10 novembre 2013

Jasmin : AL POÈTO LAMARTINO - au poète lamartine - 1849

AL POÈTO LAMARTINO

En li didian La semmâno d'un fil

1849

De faous republiquèns? per èstre al prumè ren,
Sul puple tournat rèy bouffâban de beren;
Sa coulèro, un mati, touto descadenâdo
Aouyò tout brigaillat belèou;
Tu soul, gran rèy de la pensâdo,
Tu soul, dins quatre mots, l'aguères mestrejâdo;
Et la Franço espaourido, à ta bouès, besquèt léou
S'abali lou rouge drapèou!!

S'abioy ta boûco d'or, toun parla que tan brillo,
Te diyoy que, dins ta grandou,
De l'Estat, de la Glèyzo et de câdo famillo,
Fusquères aquel jour lou triple saoubadou!

Diyoy qu'un jour bendra!!... Mais dins lous prats setudo,
Ma Muzo en politico âro s'és fèyto mudo;
Nou canto que lous rious, lous paourets, las amous,
Et nou trôbo en lot plus soun pugnadet de flous....
Es al prat que gragnèt aquelos pimparèlos
Que dins Paris, che tu, me balguèron apèy
Lou bèl bren de laourè poumpounat d'immortèlos,
Doun boudroy te paga dan moun bouquet d'anèy.

Pitchou deoute de poèzio
Pot se paga damb'un escriou;
Mais gros deoute de la Patrio...
Oh! la Franço nou pot que te crida: Mercio!
N'a pas prou de laourès dunpèy lou mes d'abriou,
Per paga tout ço que te diou!!

*+*+*

vendredi 8 novembre 2013

J. Castagno : SIMOUN lou Carbounié - part I & II - (DRAMO DE LAS MINOS CEVENOLOS)

SIMOUN lou Carbounié

(DRAMO DE LAS MINOS CEVENOLOS)
(Pouëmenet à dire)

Lou gal blanc a canta. L’aubo a lusi per orto.
Lou sourel risouiè poutounejo la porto
De l’oustau blanquinèl dau carbouniè Simoun.
Dins lou fougau tout dort: Paire, maire, marmaio.
Es dimenche e campos. Mè lèu Simoun desmaio,
Se segno, durbis l’ièl. . e prègo Aquel d’amount.

Pièi sauto, rebiscoul. En se nipant siblejo;
Ris à soun curo-nis qu’en soun bressoul brassejo;
Galejo soun cadet; poutouno son aina;
Sa fenno, encaro au liè, la panlèvo à brassado,
E countent coumo un rèi de touto sa nisado,
Sort pipeja ‘u bon èr... e torno à dejuna.

S’ataulo ! Tros de pan, lou missou, la bouteio;
Sèt fes bouido son got, — lou vin a pas d’esteio,
Pièi rouge, fres, gaiard, rebarro soun coutèl.
Aro, s’hou dis, galòi: “Ai brafa coum’un niafre,
“Me vau rasa, pimpa, lor carra coum’un chafre,
“M’anarai passeja dins lous bos dau Castèl !”

“— Oh! safenno ié dis? Coussi n’as pas vergougno,
“ Un litre, bon matin, siés mai que mai ibrougno !
“ Bèl eisemple, bardot, per tous jouines enfants !...
“ Ah ! sans aquel defaut, que seriés brave paire !
“ N’i’a pas dès coumo tus dins lou tout negre caire...
“ Simoun ! begues pas pus que te crèmes lou sang.”

“— Fenno ! Veiras pus lèu tres omes dins la luno
“ Que Simoun derraba sas soucos à la bruno !...
“ Mancas jamai de pan! Fau pas tort à dingus !
“ Jogue pas! Courre pas ! Siéi pas au det dau mounde !
“ Lou paure a que l’amour e lou vin... per desbounde.

Béure es plesi das diéus e lou regal das Gus...

“ Siéi Gus ! Laisso-me dounc lou plesi que me rèsto;
“ Que se per cop d’asard n’acampe mau de tèsto,
“ N’ai pas jamai perdu lou sèn, lou camin dret.
“ Jamai sièi pas vengu sans te pourta ma pago;
“ Jamai ai pas agu vergougno de ta bago;
“ Simoun passo la tèsto nauto en tout endret.

“ Sièi Gus ! Ai quaranto ans, uno santa soulido,
“ Tres anjounets dau cièl. O ma Jano poulido
“ Laisso l’auro boufa ! Viéu en pas, sans soucits.
“ De traval, sèmpre n’i’a. Lou carbou de la mino
“ Demando qu’à sourti dau founs de la toumplino,
“ E Simoun fougno pas à l’obro, doumacis ! ”

“— Te charpe pas d’acò, te prègue de pus béure. ”
“— M’enmasques, à la fin, autant vaudrié pus viéure.
“ Mé, zóu ! fai un poutou. Parte, Janeto, adiéu.
“ Adiéussias, bèus manids !... ” E s’en vai ! Uèi es fèsto;
De vèspre lou vèiren embé de fum en tèsto;
Mé d’avanco a perdou, car l’aimou coumo Diéu.

*+*+*

Es parti. Vai planet de-long la travesseto.
Lou tèms es gai, lou cièl tout blu, l’auro douceto;
L’aigage en s’enaurant perfumo lous draiòus.
Tout canto, tout lusis, tout flambo dins la coumbo;
L’iroundo es un eliéu; un rai blound la paloumbo.
S’es muda ‘n fadariè lou païs das Raiòus.

Chasque aucèl voulastrant porto au bè la becado;
Dins l’aire entebesi dansejo la mielado;
L’oubrié tout esmougu lando dins lou sourel.
Tressauto maugrat el, pipejo, ris e canto;
Penso en tout; penso à res, e la vido l’encanto;
L’estrambord printaniè lou couflo coum’un grel.

Muso, troto, courris; s’aplanto; tout l’atiro
S’assèto, parlo soul, plugo l’ièl, s’espautiro;
Repart, cor bacelant; zounzouno un redoundèl;
Trovo un riéu clarinèl, ié ris, e... se descausso

E lou gaso, trin-tran... Pièi refresca, se nausso
Pèds nus, sus lou ribas... e, zóu ! dins lou pradèl.

*+*+*

mercredi 6 novembre 2013

J. Langlade : L'AGNELOU BANUDET

L'AGNELOU BANUDET

A PAU DE MARIETOUN

Un pastre majourau,
Fossa entendut, mais la man greva,
Pasturgava aquì d'aut
Un avé talament de leva

Qu'en lioc belèu jamai s'era vist lou pariè;
Jujàs un pau, aquì i'aviè
Ce milhou de toutas las menas.
Au coustat dau Larsac, lou grel de las Cevenas,
Vesiàs soun crousat, lou Rufard,
Lou ruste e banut Caussinard,
L'Aurilhagués menut, que de pertout s'en batoun,
Mariogencs e Bisets, dins l'Ausera abarits,
Albigés e Genés, Sarasìs e Carcìs,
Qu'entre Garouna e Tar per lous prats se recatoun.
I'aviè, tant-ben, lou Campanés,
Lou Bigourdan, lou Lesat ariegés,
E touta la bela nineia
Que d’en Pirenèu porta emb ourguiol la lieureia,
Emé lou Roubioun prouvençau
E lou Berrichoun tant grelhau,
Enfin tout ce que i'a de frica
De Lengadoc, de païs franchimands,
Jusqu'à de Crousats alemands,
Mema de Barbarins d'Africa
E tout, d'aco dau bèu.
Es be segur qu'un tal vacieu
De tant de menas afrairadas,
Noun pouviè fa de mens
Que de dounà countentaments
E rendas ben asseguradas;
Tabé, cap d'an, dau lach, de la lana, dau crei.
Dau curalhat, que s'enlevava en fieira,
Pourtava au mens per faire la berquieira
D'un fil de Rei!
Aco toujour me ven: ai! quantas bassibadas!
O quantes ficassauts d'arets!
Que de sounalieiras floucadas!
Quantes ternencs! mais ce pus bèu de res,
Era de primadiès que fasien lum de veire.
Es aqui qu'auriàs vist
Beligasses, anìs,
Escardussats, couma se pot pas creire.
Un d'aqueles, un beligàs,
Lou pus garrut, lou mai jouinàs,
Dins tout aco subrava,
Tabé, lou mestre lou badava,
Era das mai recabalats.
Agnel de lach, libre e foulàs,
Trepava après sa maire
Tetant tout soun sadoul,
Quand lous dau mema crei, pecaire,
Eroun desmamats; belèu soul
Noun saguet das destetadisses.

lundi 4 novembre 2013

AUTHEMAN. : JACOUMAR PAIRE E FIEU

JACOUMAR PAIRE E FIEU

Autro-fes, quand venié qu'un ome trepassavo
D’usage, dins soun art, soun fiéu lou ramplaçavo,
Car lou fiéu douno ajudo au paire e d'aquéu biai,
Souvènt es autant qu’éu au courrènt dóu travai,
Mai vuei n'es plus ansin, tóuti fan la bestiso
De chanja d'emplega tout coume de camiso;
Ço que fai que, i’aguènt pèrtout d'ome nouvèu,
O tout se distimbourlo o tout vai de cantèu.
Se me permete aquéu pichot bout de critico,
N’es pas moun entencioun de parla poulitico;
Es acò que nous met tóuti dins lou bourboui
E despièi proun de tèms sabèn ço que n'en coui.
Revenen.... Vous disiéu qu'antan, dins li famiho,
Dóu travai peirenau li garçoun e li fiho
Fasien l’aprendissage à l’oustau.... S’estruisien
Dóu trafi que si paire e si maire fasien,
E quand avien lou goust e lou biais de ié mordre,
Bèn souvènt devenien d’oubrié de proumier ordre.
Au-jour-d’uei, se lou paire es courdounié, lou fiéu
Dis: — Tira lou lignòu! Acò ’s trop bas pèr iéu.

S’es païsan: — Adiéu, poudès me veni querre,
Paire! Vau m'entrauca dins lou camin de ferre.
Se saup un pau escriéure e proun legi, lèu-lèu,
Vòu èstre professour o garçon de burèu.
Li chato que l’amour de la teleto afolo,
Pantaion lou brevet de mestresso d’escolo.
Antan, se lou paire èro amoulaire o fustié,
Eh! bèn, vesias si fiéu countunia soun mestié;
E s'èro jardinié, lou paire, la marmaio
De bono ouro sabié reclaure l’ourtoulaio.
M'anas dire: — Perqué tout aquéu racontar?
Es just pèr vous parla di dous vièi Jacoumar
E vous dire perqué fuguèron mes deforo
E ramplaça au clouchié pèr soun fiéu e sa noro.
L'autourita d'alor, lou cas estènt pressant,
Anèron pas bèn lieu cerca de ramplaçant,
Bèn segur que degun devié miés saupre faire
Qu'un fiéu qu’avié ’studia lou mestié de son paire.
Or veici que sujèt aguèron de seriéu
De remplaça lou vièi Jacoumar pèr soun fiéu.

Planta dre, tóuti dous, dins soun arcado viejo,
L’ome picavo l'ouro e la femo la miejo.
L'obro, à dire verai, sèmpre avié bèn marcha,
E lis Avignounen poudien s'ana coucha
Tranquile, assegura que li campanejaire
Li reviharien just à l’ouro dis afaire,

Quand se vai devina qu’un vèspre, sus lou tard.
Un ami vèn trouva lou brave Jacoumar
E ié dis: — Esto sero, anan faire riboto,
Fau que vènges, cargan uno miejo-culoto!
Jacoumar voulié pas quita soun posto; mai
Tant de fes sa mouié ié digué: Vai-ié, vai!
N'ai pas besoun de tu, iéu, pèr souna lis ouro
Que vès-l'aqui parti ’mé l’ami Jan Toutouro.
Enregon l'escalié, que davalon plan-plan,
S'arrapon bras dessus, bras dessouto e s'envan
Abas en Bartalasso, ounte quàuqui coulègo
Lis esperavon, tout en se lipant li brego,
Car à l'àsti viravo un superbe dindas
E l'óudour d’un civié gatihavo lou nas.

Se faguè pèr ma fisto! uno noço coumplèto
E, coume l'avien di, carguèron miejo-guèto.
Acò 's rèn... Mai amount Madamo Jacoumar
Ero desmemouriado e picavo à l’asard.
La paureto, dis ouro avié perdu lou comte
E (lou cas s'es passa tau que vous lou raconte),
Tantost li despassant et tantost batènt court,
Garcè ’n chereverin que durè jusqu’au jour;
E tau èro l'emboui dis ouro que sounèron
Que lis Avignounen sabien plus mounte n’èron.
Enfiouca pèr la dindo e lou vin calourènt,
Lou brave Jacoumar se doutavo de rèn.
Mai quand, sus lou matin quitè la Bartalasso
E que, gai e redoun, arribè sus la plaço,
Pecaire! e qu'ausiguè tout aquéu chafaret,
Au reloge escalè tant qu’aguè de jarret.
Sa femo cerquè proun pèr se metre à la sousto...
Mai l'aguè lèu trouvado e... iè fichè 'no rousto!
Fau dire que jamni èro esta tant brutau
E qu'un quart d’ouro après n’aguè 'n regrèt mourtau,

Or, quand fuguè grand jour, li Conse s’acampèron
E, cresènt qu'èro fòu, en cors deliberèron
Que falié ramplaça lou paire pèr lou fiéu;
E despièi lou reloge a marcha forço miéu.
Car lou fiéu Jacoumar sachènt ço que n'en costo
De faire un bon repas, quito jamài soun posto,
E tant a bono pougno e fai bèn soun devé
Que l’ouro d’Avignoun s'entènd à Mont-Favet.

E di vièi, que n’an fa? La vilo noun ingrato
Au Museon Calvet i’a douna sa retrato.
Aqui s'atrovon bèn... Demandon soulamen
Un pichot refrescaga à sis abihamen.

AUTHEMAN.

*+*+*

samedi 16 novembre 2013

jeudi 14 novembre 2013

mardi 12 novembre 2013

dimanche 10 novembre 2013

vendredi 8 novembre 2013

mercredi 6 novembre 2013

lundi 4 novembre 2013

S’abonner à Marsyas2