T. DAVID. - A MADAMISELLO

 

 

A MADAMISELLO
(Souveni de Vals)

 

— Perqué tant lèu vous enana?
Me diguerias, o gènto fiho,
Alor que dins l’après dina
Deviéu rejougne ma famiho.

Ah! de segur s’aviéu pouscu
Resta 'mé vous quàuqui semano
Dins lou bonur auriéu viscu
Luien dóu mounde e de si chavano.

Mai quand aurien dura de tèms,
Aquéli jour de benuranço!
Faudrié pamens, à tard o tèms
Parti de vosto demouranço.

E me sarié ’sta pu marrit
De vous leissa, quand dins moun amo,
I’auriéu, pèr l'amour agarrit,
Senti l'ardènto e puro flamo!

Car vòstis iue dejà pèr iéu,
Eron dos estello bessouno;
E voste sourire agradiéu
M'èro autant dous qu’uno poutouno!...

Mai pèr qu’encaro aùtri tourmen
Noun me faguèsson macaduro,
Rèn n’en diguère... e vitamen
M’esbignère dins la veituro.

M’es esta dounc proun segrenous
De m'aliuencha de vosto caro!
E de pensa que belèu vous
Noun sounjarias à iéu encaro.

M’a sembla 'n dòu de vous quita!
Bèn talamen vòsti sourrire
E voste biais de braveta
M’avien charma qu'es pas de dire.

Tambèn, se poudiéu quauque jour
Mai agué l'ur de vous revèire,
Countènt sariéu, s'a moun entour
Vous plaisissias, de vous ié vèire.

(D’en Vilo-Novo ... d'Avignoun)
T. DAVID.
1900

*+*+*