F. Mistral : Lou marit oste

Lou marit oste 

— I — 

Sabès que lou bon Diéu, emé Sant-Pèire e Sant-Jan, de-fes fan sa tournado sus la terro pèr puni li marrit e recoumpensa li bon. Un jour dounc que Noste Segne, em’aquéli benurous, varaiavo en aquest mounde, intrèron dins uno aubergo pèr prene soun repas. 

E quand aguèron dina, lou bon Diéu diguè à Sant Jan: 

- Pago, Jan. 

- N’ai pa ’n sòu, diguè Sant-Jan. 

E se virant de-vers sant Pèire, lou segnour ié fai peréu: 

- Pago, Pèire. 

- N’ai pa ’n sòu, diguè Sant-Pèire. 

E alor lou bon Diéu mandè la man en pòchi, e sourtiguè ’no bourso pleno de louvidor. N’en baiè un à l’oste, s’aubourè, e s’enanèron. 

— II —

Mai pas pulèu èron deforo, l’oste fai à sa femo: 

- As vist aquelo bourso? oh! queto bourso! rèn que de louvidor, de louvidor en or!... 

Se i’anave leva? 

- Diéu t’engarde, miserable! sa femo ié diguè. 

- Eh! saumo, laisso faire. Aquel or trelusènt me fai boumbi lou sang, nosto fourtuno es facho... Li vau arresta. 

E ’m’ acò, lou gusas pren un acóurchi, vai se metre à l’espèro à la crousiero dóu camin, e coume lou bon Diéu pareiguè ’mé si coumpagnoun, l’oste ié part dessus, emé soun coutèu à la man, e ié crido: 

- Arresta! la bourso o la vido!

Mai n’avié pas bada que lou bon Diéu lou toco de sa man pouderouso, e lou tremudo en ase... L’oste, en un vira d’iue, devengué ’n ase rouge, un gros ase pelous, aurihu, tout basta e bèn encabestra. 

- I, diguè lou bon Diéu. 

E l’ase filè davans, e li tres benurous ié mountavon dessus un pau chascun, quand èron las. 

— III — 

Veici que, pèr camin, au bout de quauque tèms, van rescountra ’n paure móunié que plegavo lis esquino en pourtant un sa de blad, e que susavo à gros degout en quichant lou poung sus l’anco: 

Noste Segne ié vengué: 

- Mai, paure ome, pecaire! en carrejant ansin vòsti sa sus l’espalo, vous anas relassa! 

Pourrias pas croumpa ’no bèsti? 

- Certo, avès proun resoun, lou móunié respoundeguè. Mai coume voulès faire, quand avès ges de d’argènt? 

Lou bon Diéu ié diguè: 

- Voulès que vous louguen aquest ase? 

Lou móunié pausè lou sa, regardè lou bourrisco e diguè: 

- Vole bèn, se cantas pas trop aut, car pèr un ase, es un bèl ase! 

Noste Segne alor ié dis: 

- Vous lou lougaren per sèt an: tóuti li jour que Diéu a fa, metrés un sòu dins uno bourso, em’ acò, fin di sèt an, nous dounarés pèr pago ço que i’ aura dedins. 

- Ato! lou móunié faguè, poudès pas èstre mai resounable. 

- Vès, soulamen, lou bon Diéu apoundeguè, vous avertisse d’uno causo: aquel ase manjo rèn. Se nourris que de regardello. Tóuti li fes que bramara, arraparés un barroun, e zóu! sus lis esquino! N’es pas besoun d’autro pitanço pèr ié donna de flamboueso. 

- Acò sufis, brave ome! lou móunié respoundeguè. E ’m’ acò, se derrabant quàuqui péu de la barbo, li jitè au vènt, coume se fai, en cridant: 

Pacho 

Pacho 

Cènt escut pèr la desfacho! 

E enmenè l’ase au moulin. 

— IV — 

Ah! moun paure bardot! n’aguè de cop de barro! Durant sèt an de tèms tóuti li fes e quanto bramavo la fam, lou móunié agantavo un bastoun de quatre pan, e sabavo dur... 

Basto, quand li sèt an fuguèron acoumpli, lou bon Diéu passè au moulin: 

- Veniéu querre moun ase, dis, emé lou salàri que sian esta d’acord. 

- Moun bon, rèn de plus juste, lou móunié respoundeguè. Aquest avié fa fortuno,ujas! em ’un ase ansin que manjavo que de regardello e travaiavo coume un cifèr! 

Paguè rubis sus l’ounglo la soumo qu’à cha sòu s’èro acampado dins sèt an. Noste Segne la prenguè, agantè l’ase pèr la caussano, em’ acò s’en venguè, emé Sant-Jan e Sant-Pèire, tout dre-à-n-aquelo aubergo ounte une fes avien dina. 

- Bon-jour, la femo! ié diguèron à l’oustesso, belèu nous couneissès plus? Es nous- àutri que passerian, i’a sèt an... vous rapelas pas?... Memamen, qu’en sourtènt, à la crousiero nous arrestèron. 

- Ha! l’oustesso cridè, bràvi gènt, es vous-autre. Diéu vous lou doune, lou bon vèspre! Mai, vès, à vous bèn dire, despièi lou jour que dinerias eici dins un moun lougis, ié dèu avé sèt an, m’es arriba que de malur. Degun vèn plus à moun aubergo, moun ome a despareigu... 

- Voste ome? diguè lou bon Diéu, es aqui sus la porto. 

L’oustesso sort e sauto dins li bras de soun ome à quau noste Segnour avié rendu sa formo. 

Lou bon Diéu s’avancè, e ié diguè à l’oste: 

- Eh! bèn, te servira la leiçoun que t’ai douna? saras brave, aro? 

- Ah! Segnour, cridè l’oste en toumbant à geinoui, perdounas-me, persounas-me! 

- Tè, diguè lou bon Diéu, vaqui aquelo bourso: es l’argènt qu’as gagna dins li sèt an de penitènci. E, que fague un bon usage! car l’argènt, pèr que flourigue, fau lou gagna, noun lou rauba. 

E ’m’ acò l’Autisme, Sant-Pèire emé Sant-Pau, s’esvaliguèron.

Armana prouvençau 1876 

*+*+*+*+*

Mèste Eisseto : JANO D’ARC - Jeanne d'Arc

JANO D’ARC 

A moun ami L. Foucard. 

Vierge, que dins li bos, timido pastourello 

Escoutaves lou Diéu dis amo sounjarello 

O Jano ! Clino-te, qu’entendras en retour 

La Franço qu’à ti pèd carrejo soun amour. 

Veiras, dins aquest mes, mounte tout li rastello, 

De flour sus toun autar à pleno canestello 

E de faioun Françès de tóuti li coulour

Balançant dins l’azur lou simbèu dis ounour. 

Martiro ! dóu brasié quand s’envoulè toun amo 

Quand ta bouco à mita rousigado di flamo 

Jitè lou darrié crid de ta Fé, de tis an, 

Afourtissiés deja que religioun, famiho 

Entretenien l’amour sacra de la Patrìo 

Emé... mens d’avoucat e mai de païsan! 

*+*+*+*

P. Berengier : Marseille d’Altovitis - uno grando marsiheso óublidado

Marseille d’Altovitis

uno grando marsiheso óublidado

Soun pichot noum, Marseille, es pulèu rare e soun astrado tambèn ! Marseille d’Altovitis vo d’Altoviti mouriguè à 29 an mai avié agu lou tèms de veni la mai presado dis « inteleitualo » marsiheso dóu siècle XVI. Li Marsihés l’adouravon e li pouèto sestian (à l’entour de Malherbe) ié pourtavon respèt.

Sa maire que tiravo de la nauto noublesso bretouno, èro « Fille demoiselle » dins l’« Escadron Volant » de Catarino de Medicis e fuguè, un tèms, la mestresso dóu du d’Anjou, lou futur Enri III. Maridè, en segóundi noço, un Prouvençau, Felip Altoviti, capitàni di galèro, que tiravo d’uno famiho flourentino celèbro. Ero lou fiéu de Fouquet d’Altoviti e d’Ano de Casaulx. Enri III lou faguè, pèr soun maridage, comte de Castelano e la novio reçaupeguè, elo, la segnourié de Bèumount.

Aguèron quatre enfant qu’uno ié meteguèron « Marseille », un privilègi di rare d’aquéu tèms, que l’óutenguèron bonodi soun ouncle avoucat de la vilo. Lou peirin èro Carle de Casaulx, lou « ditatour » e ligaire.

Aquelo chato, Marseille, escrivan recouneigudo, participè à laproumiero obro estampado à Marsiho en 1595, lis « Obros e rimos » de Bellaud de la Bellaudiero qu’espeliguèron coume un brulot pèr la Franço. Verai qu’aquelo estamparié municipalo, avié pèr toco d’espandi de tèste dedica à la « République Marseillaise », souto la beilié de Casaulx.

Quouro lou du de Guiso, prenguè Marsiho après l’assassinat de Casaulx, Marseille d’Altovitis venguè sa mestresso e la proumiero damo de la vilo. Trevavo alor li saloun dóu gouvernour de Prouvènço. Pourtavo de vièsti d’or e largavo de presènt à la poupulacioun. Li Marsihes l’amavon e la badavon. Mai quouro lou du la laissè de caire, amè mies de se retira. 

La seguido, la trouban dins la « Vie de Rancé », de Chateaubriand « La belle Châteauneuf accoucha en Provence d’une fille, qui fut tenue sur les fonts de baptême par la ville de Marseille. [...]  Sa fille, Marcelle ( ! ) de Castellane, fut laissée sur la grève de Notre-Dame de La Garde comme une alouette de mer. Ce fut là que le duc de Guise, fils du Balafré, la rencontra. […] Il s’était emparé de Marseille pour Henti IV, et il portait le nom de Guise.

Marcelle de Castellane lui plut; elle-même se laissa prendre d’amour: sa pâleur, étendue comme une première couche sous la blancheur de son teint, lui donnait un caractère de passion. A travers ce double lis transpiraient à peine les roses de la jeune fille. Elle avait de longs yeux bleus, héritage de sa mère. Elle dansait avec grâce et chantait à ravir, mais, élevée avec les flots, elle était indépendante. Elle s’aperçut que le duc de Guise commençait à se lasser d’elle ; au lieu de se plaindre, elle se retira. L’effort était grand; elle tomba malade, et comme elle était pauvre, elle fut obligée de vendre ses bijoux. Elle renvoya avec dédain l’argent que lui faisait offrir le prince de Lorraine: « Je n’ai que quelques jours à vivre, dit-elle: le peu que j’ai me suffit. Je ne reçois rien de personne, encore moins de M. de Guise que d’un autre. » [...] Les calculs de Marcelle étaient justes; on ne lui trouva rien; elle avait compté exactement ses heures sur ses oboles; elles s’épuisèrent ensemble. La ville, sa marraine, la fit enterrer. Trente ans après, en fouillant le pavé d’une chapelle, on s’aperçut que Marcelle n’avait point été atteinte du cercueil: la noblesse de ses sentiments semblait avoir empêché la corruption d’approcher d’elle. Lorsque le duc de Guise partit pour la cour, Marcelle, qui possédait deux lyres, composa l’air et les rimes de quelques couplets, paroles de poésie et de langueur, voix d’un rêve oublié, chagrin d’un songe: 

« Il s’en va, ce cruel vainqueur, 

Il s’en va, plein de gloire;

Il s ‘en va, méprisant mon coeur,

Sa plus noble victoire.

Et malgré toute sa rigueur

J’en garde la mémoire.

Je m’imagine qu’il prendra

Une nouvelle amante. »

Maudespié l’amour que ié pourtavon li Marsihés, la vilo n’en gardo pas memòri. Ges de felen dirèit mai uno branco de la man de sa sorre. La segnourié de Bèumount dispareiguè en 1903, chabido pèr la vilo. Rèsto que li quartié de Bos Lou Mèstre e de Bèumount e dos carriero vers lis Lèio de Meilhan pèr ramenta sa memòri.

P. Berengier

D’après un article de Jacqueline Denut, dins « La Gazette du Comité du Vieux Marseille ».

Mèste Eisseto : FREDERI MISTRAL A L’ACADÈMI

FREDERI MISTRAL A L’ACADÈMI 

Ié vagues pas ! 

Oh! noun, ié vagues pas! auriés lèu la fangalo 

S’entendiés plus canta roussignòu ni cigalo; 

S’en plaço dóu soulèu qu’embaumo li meloun 

Te falié respira la nèblo di saloun. 

Eila, de que fariés ? Dins la grand capitalo 

Se quauque Francihot te disié : Fai ta malo ! 

I Quaranto, segur, virariés li taloun, 

E d’ome coume tu n’en an pas de mouloun. 

Eici, siés noste rèi. La Prouvènço t’adoro. 

Ta Mirèio sarié soulo dins lis en foro; 

Emé toun àbi vert, en van t’esperarié. 

E nautre, gènt de mas, dins l’esclùssi de l’Astre 

Qu’a fa lusi si rai, sus la tèsto di pastre 

T’ou demande, o Mistral! quau nous esclararié ? 

*+*+*+*

F Mistral : La peticioun di Limousin - Grégoire XI

La peticioun di Limousin

Li Limousin an passa de tout tèms pèr avé bon apetis: pas tant bon, un pau mai, es soun prouvèrbi. Coume lou Limousin es uno terro maigro e que lou blad i’es rare, ou pan, autre-tèms subre-tout, èro un manja requist. Vaqui perqué se dis: Manja de pan coume en Limousin. Uno fes, à Limoge, un massoun veguè soun manobro que, pèr lou ebouli, trempavo soun courchoun dins la gamato dóu mourtié: 

- Pichot, cridè lou mèstre, crese que te fas gourmand! Coumpanejo-te, Sant-Marsau! 

En l’an de gràci 1371, un papo Limousin que ié disien Gregòri XI carguè la tiaro en Avignoun. Ravi de la nouvello, si coumpatrioto partiguèron en embassado pèr lou benastruga. Lou soubeiran Pountife li reçaupè graciousamen e pièi ié demandè, avans de li chabi, ço que poudrié faire d’agradiéu pèr éli. 

- Sant-Paire, adounc faguèron lou Limousin es paure, lou sabès; ié rendrias grand service, se ’i’acourdavias, pecaire! dos recolto de blad pèr an. 

Lou papo respoundeguè: 

- Vous lis acorde, vous lis acorde... Mai, mis enfant, à-n-uno coundicioun es que farai lis an de vint-e-quatre mes. 

Armana prouvençau 1870 

Mèste Eisseto : FRATERNITA DI TRAVAIAIRE

FRATERNITA DI TRAVAIAIRE 

Se venien d’asseta darrié d’un garbeiroun 

Tóuti li meissounié d’uno chourmo galoio 

Lou baile èro au mitan, éli fasien lou round, 

En esperant chascun sa cebo e soun anchoio. 

Lou travai à la fam douno un cop d’esperoun: 

E, pamens, un jouvènt que la fre desmemoio 

Assajavo de mordre un moussèu de touroun 

Que soun gousié trop se dins sa pocho ramboio 

— Tè, vejaqui moun iòu, dis lou baile au febrous, 

L’ourdinàri vòu rèn pèr li qu’an lou degoust 

Car eici, dins lou mas, sèmblo toujour divèndre. 

O gramaci ! respond lou segaire esmougu 

Vous privas de voste iòu, pèr iéu, un paure gu; 

Que lou bon Diéu vous doune un biòu pèr vous lou rèndre ! 

*+*+*

FELIPO MABILLY : Lei bancaroutié

Lei bancaroutié  

Pèr prouva que, dins nouestro vido, 

Qu fa bancorouto a pas tort, 

E pèr si rendre soulitari 

Dei counfraire qu’aourien de garri 

Dins sei cofre, en lué de tresor. 

Mai tout discour di de memori 

Pèr l'aspirant, aou parlatori, 

Merito pas toujours l’ounour 

D'agué soun titre vo deviso 

Countro la placo en letro griso, 

Emé d'estelo d'or aou tour. 

Faou, per rescountra tallo aoubeno, 

Que leis ideio que sameno 

Pessugon l'esperit lei sèns. 

De mai dei tres quart dei coulègo; 

Vo, pèr va dire en boueno règo, 

Dous cent cinquanto sus très cent. 

Lou vote si fa sus l'estrado, 

Dins uno bouito bèri gardado 

Pèr lei gent doou bureou, en round: 

Cade fraire pouarto sa biho, 

Jaouno vo negro, que resquiho 

Dins lou traou coumo dins un troun. 

e lou mouloun dei jaouno passo 

Lei negro, l'aspirant prend plaço 

Après douei mes aou sendicat; 

E quand arribo lou countrari, 

Fara, pèr estre soucietari. 

 *+*+*+*