FRATERNITA DI TRAVAIAIRE
Se venien d’asseta darrié d’un garbeiroun
Tóuti li meissounié d’uno chourmo galoio
Lou baile èro au mitan, éli fasien lou round,
En esperant chascun sa cebo e soun anchoio.
Lou travai à la fam douno un cop d’esperoun:
E, pamens, un jouvènt que la fre desmemoio
Assajavo de mordre un moussèu de touroun
Que soun gousié trop se dins sa pocho ramboio
— Tè, vejaqui moun iòu, dis lou baile au febrous,
L’ourdinàri vòu rèn pèr li qu’an lou degoust
Car eici, dins lou mas, sèmblo toujour divèndre.
O gramaci ! respond lou segaire esmougu
Vous privas de voste iòu, pèr iéu, un paure gu;
Que lou bon Diéu vous doune un biòu pèr vous lou rèndre !
*+*+*
Aucun commentaire:
Enregistrer un commentaire