L'AUBO
Sus lou cresten de la mountagno,
La primo-aubo en largant si rai,
Dins lou cèu gris trempe d'eigagno,
Coucho la luno que s'envai.
Li chin japon, lou mas s'esviho,
Li ràfi destacon si miòu,
Sus lou lindau cridon li fiho;
L'aubo lusis dins lou draiòu.
Ai durbi ma fenèstro; un aire
Fai boulega lis amelié:
Vese mounta dous iue sounjaire
À la testiero de moun lié.
Amigo, dóu tèms que s'enfuso
La lus dins toun chambroun barra,
As pas senti, sus ta car nuso,
Un rai de l'aubo s'esmarra?
As pas senti, sus ti parpello,
Dóu matin boufa la frejour?
Pèr mai dourmi, dins ti dentello,
Acato-te. Veici lou jour.
*
* *
Sus la plano, l'aubo davalo,
L'eigage a bagna lou ribas,
Lou fin neblun que se rebalo
Tapo la cimo di jouncas.
Long de la costo clapeirouso
S'en van lis ome atravali;
Adeja, de ma niue febrouso
Lou sounge urous s'es esvali.
Dins la cour, crido la carello,
L'aigo regolo sus lou bard,
Uno calandro cantarello
Mounto e viro dins lou cèu clar,
E, reviha, de moun ausido,
Couchant, voulountous, li resson,
Te vese plus, amourousido,
Dins li messorgo de la som.
Arregardo: di brusc en aio
Lis eissame van s'envoula.
Fai toun obro, moun cor, travaio,
L'aubo dóu jour a davala.
*+*+*+*
2 commentaires:
Adiu Marsyas, te legissi de temps en temps e aimi tant co que dises de Macabiès qu'es del villatge a coustad dal meu.
Fas pla de garda nostro lengo coumo un trésor. Jean Camp, un païs à Macabiès a dit
"...Es èl lou paraulis sans taco
Que sentis bou lou fé, lou mèl,
La garrigo, lou vi nouvèl
E l'orgo caudo de la raco
Es lou fial d'or que nous estaco
A nostro terro, a nostre cèl !" Jean Camp / Lou Doublidaïre.
Pourto te pla e à l'an que vèn, si sièn pas maï que siogèn pas mens.
se poudres me manda aco me faries gau!!!!
Lou publicaren de segur...
Amistousamen
Sèrgi
Enregistrer un commentaire